Donostia Kulturak banatzen duen Adarra saria jaso du gaur Berri Txarrak taldeak, Donostiako udaletxean. Arratsaldean, kontzertua eskainiko du Victoria Eugenia antzokian eta, azkenaldian taldearen emanaldietan ohikoa den moduan, sarrera guztiak agortuta daude.
Taldeak eskerrak eman ditu sariarengatik; nazioartean izandako oihartzunagatik eman diote saria, eta Gorka Urbizu abeslariak adierazi du euskal ekosistema kulturalari Euskal Herrian eman behar zaiola batez ere ikusgaitasuna, nazioartean baino lehenago. Urbizuk aitortu du "kristalezko sabai batzuk" haustea lortu dutela, baina "salbuespena" izan direla euskal musikarien artean: "Hemen bertan dugu baitailarik handiena", esan du abeslariak, eta "han bai, baina hemen ere bai" esanez amaitu du hitzaldia.
Eskerrik asko!#adarrasaria2019pic.twitter.com/5mc7Wz8Qlb
— Berri Txarrak (@berritxarrak) 21 de junio de 2019
Eneko Goia Donostiako alkateak Berri Txarrak-en lana goraipatu du. Haren esanetan, "euskal musikaren eredu" da taldea.
Berri Txarrak-ekoak AEBetatik eta Mexikotik egin duten biratik iritsi dira duela gutxi, eta udako kontzertu saila prestatzen ari dira orain buru-belarri. Horien artean, emanaldi berezia izango den Kobetamendikoa. BERRIAk taldeari eginiko elkarrizketa argitaratu du gaur.
