Foruzaingoak jakinarazi duenez, gaur goizean langile bat hil da Arbizun (Nafarroa). Lakber Mecanizados enpresan ari zen lanean, eta makina batek harrapatuta zendu da. Hil den langileak 35 urte zituen eta Etxarri Aranatzen bizi zen.
Mediku zerbitzuak eta suhiltzaileak ezbeharraren tokira joan dira, baina ezin izan dute ezer egin langilearen bizia salbatzeko, eta haren heriotza baieztatu dute. Gorpua Nafarroako Auzitegi Medikuntzako Institutura eraman dute, autopsia egiteko.
Lakber enpresa Lakuntzakoa da, baina Arbizun ere badu lantegia. Sakana Kooperatibako kide da enpresa hori.
LAB sindikatuak salatu duenez, Euskal Herrian aurten hil den 27. langilea da; bederatzigarrena Nafarroan. Sindikatuak ezbeharrari lotutako "zirkunstantzia guztiak" argitzeko eskatu die erakundeei eta enpresako arduradunei; "batez ere, kontuan hartuta hiru langile hil direla azken lau urteetan enpresa horretako bi lantegitan", gaineratu dute.