Gastronomia

Munduko hirugarren jatetxe onena jo dute Etxebarri erretegia

The World's 50 zerrendako lehen hamarren artean dago Andoni Luis Adurizen Mugaritz jatetxea ere, eta beste zenbait euskal sukalde sailkatu dituzte 50 jantoki onenen artean: Azurmendi, Elkano eta Nerua.

Bittor Arginzoniz, artxiboko argazki batean. /
Bittor Arginzoniz, artxiboko argazki batean. / Raul Bogajo/Foku

Berria -

2019ko ekainak 25

Atxondon (Bizkaia) dago Bittor Arginzoniz sukaldariaren Etxebarri erretegia, eta gaurtik munduko jatetxerik onenen zerrendan hirugarren tokian dena. Restaurant aldizkariak osatzen du munduko 50 jatetxerik onenen zerrenda, eta aurtengoa ez da lehen aldia Euskal Herriko jatetxe bat bertan agertzen dena.

Andoni Luis Adurizen Mugaritz jatetxea ere lehen hamarren artean sailkatu da. Hobetu egin du aurten Errenteriako (Gipuzkoa) jatetxeak; iaz bederatzigarren lekuan jarri zuten, eta aurten zazpigarrenera igo dute.

Lehen tokian geratu da Mauro Colagreco sukaldariak zuzentzen duen Mirazur jatetxea, eta haren atzetik Danimarkako Noma jatetxea. Aldiz, lehen 50 horietatik kanpo geratu dira Arzak (53. tokian) eta Martin Berasategi, 87. tokian sailkatu dena.

Behera egin dute bi horiek, baina munduko 50 jatetxe onenen artean Euskal Herriko beste hiru jatetxe sailkatu dira, batzuk postuetan hobekuntza handiak irabazita gainera.

Eneko Atxaren Azurmendi Larrabetzuko (Bizkaia) jatetxea hamalaugarren postuan kokatu dute aurten (iaz 29 postu atzerago zegoen). Eta Getariako (Gipuzkoa) Elkanok ere emaitza ona lortu du, 30. jatetxe hoberena bezala sailkatu baitute. Josean Alijaren Bilboko Nerua jatetxea kokatu da hurrengo, 32 postuan.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna