Klima larrialdia

Macronen argazkia kendu du Bizik Bardozeko herriko etxetik

Euskal Herriko herriko etxeetatik erretiratzen duten hamargarren argazkia da. Frantziako Gobernua klima larrialdiaren kontrako Parisko Akordioa urratzen ari dela salatu dute ekintza horren bidez.

Bizi mugimenduko kide bat, Emmanuel Macron Frantziako presidentearen erretratu bat kentzen, Bardozeko herriko etxean.
Bizi mugimenduko kide bat, Emmanuel Macron Frantziako presidentearen erretratu bat kentzen, Bardozeko herriko etxean. Bizi/@bizimugi

Berria -

2019ko uztailak 11

"COP21eko helburuetatik deslotzen ari da, guk bere potreta deslotzen dugu". Hala azaldu du Bizi mugimenduak Bardozeko (Lapurdi) ekintza. Herriko etxetik kendu dute Emmanuel Macron Frantziako presidentearen argazkia. Euskal Herrian kendu duten hamargarrena da. Uztaritzen eta Miarritzen (Lapurdi) erretiratu zituzten lehenik; Maulen eta Donibane Garazin ondoren; eta Senpere, Arrangoitze, Bidarte, Donibane Lohizune eta Getariko (Lapurdi) herriko etxeetako argazkiak kendu zituzten hurrengo.

Frantziako Estatuan, dagoeneko presidentearen 106 argazki kendu dituzte erakundeetatik. Eragile ekologistek 125 bildu nahi dituzte G7koen goi bilerarako.

Macronen argazkiak herriko etxeetatik kentzeagatik, Bizi mugimenduko zazpi kide atxilotu zituzten, joan den maiatzaren 28an. Aurretik, apirilaren 9an, bost kidek Baionako polizia etxera deitu zituzten deklaratzera. Taldean eginiko lapurreta leporatu zieten.

Macronen erretratuak herriko etxeetatik kentzeko ekintzarekin, gobernuaren "erantzunik eza" salatu du Bizik. Haren iritziz, Macron ez da neurri nahikorik hartzen ari klima larrialdiaren aurrean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna