Gipuzkoako papergintza

Langileen %70ek babestu dute Adegiren azken proposamena

Akordioari esker errelebo kontratua derrigorrezkoa izango da eta laneko gaixoaldietan soldataren %100 kobratuko dute, besteak beste.

Gipuzkoako papergintzako eta arte grafikoetako langileak ADEGIren egoitzaren aurrean protestan.
Gipuzkoako papergintzako eta arte grafikoetako langileak ADEGIren egoitzaren aurrean protestan. Andoni Canellada / Foku

Paulo Ostolaza -

2019ko uztailak 11

Aurreko astean onartu zuten LAB eta CCOO sindikatuek Adegik Gipuzkoako Papergintzako langileei egindako azken eskaintza. LABek langileei hitza eta erabakia emateko konpromisoa hartu zuen eta horiek berretsi egin dute erabakia: %70ek egin dute akordioa onartzearen alde. Aldeko bozka eskatu duen sindikatu bakarra izan da LAB. ELAk ez zuen onartu Adegiren azken proposamena eta CCOOk boto askatasuna eman die bere kideei.

Hitzarmen horrek biltzen dituen hobekuntzak lortzeko sei eguneko lanuztea egin zuten papergintzako langileek. Akordioak sektorean "betidanik egon diren eskaerak" onartzen ditu, LABek ohar batean azaldu duenez. Hemendik aurrera derrigorrezkoa izango da errelebo kontratua, eta langileek soldata osoa kobratuko dute laneko gaixo baimenetan. Soldatek ere igoera nabarmena izango dute, 2019an KPI +1 eta 2020 eta 2021ean KPI +1,25. Guraso bakarren kasuan sendagilearengana laguntzeko ordu gehiago izango dituzte beharginek, hitzarmena familia eredu berrietara egokitzeko. Horietaz gain, langileek ez dituzte oporrak galduko, gaixoaldian egoteagatik hemezortzi hilabeteetan ez hartu izanagatik; berdintasun planak egitea adostu da, euskararen normalkuntzarako mahaia sortuko da, lan osasunean hobekuntzak egongo dira, haurdun dauden emakumeentzat soldata galdu gabe lanaldia gutxitzeko aukera egongo da, etab.

LAB sindikatuarentzat hitzarmen hau da "lorpen sozial gehien" dituena azken urteetan. "Enplegua bermatzen du, irabazi ahalmena hobetzen du eta lana eta bizitzaren uztarketa errazten ditu" gaineratu dute.

Sektoreko hitzarmenaren indarraldia 2018an bukatu zen Gipuzkoan eta, oraingoz, luzaturik dago. Akordio berria uztailaren 17an izenpetuko dute.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna