Denis Coulson, Rory Grice eta Loick Jammes errugbi jokalariak epaituko dituzte Bordelen, Baionako 21 urteko emazte batek ipinitako salaketaren harira. Bordelen partida bat jokatu zuen Grenobleko errugbi taldeak 2017ko martxoaren 11n, eta biharamunean jarri zuen salaketa emakumeak: gauean sei jokalarik bortxatu egin zutela salatu zuen. Festa giroan elkar ezagutu ondoren, jokalariak zeuden hotelera joan zen emakumea. Salaketan jakinarazi zuen ohe batean esnatu zela ondoren, hainbat gizon zituela ondoan, eta bera bortxatzen ari zirela.
Bordeleko fiskalak hartu zuen bere gain salaketaren gaineko ikerketa. Auzia ikertu duen Bordeleko auzitegiak erabaki du hiru gizon horiek epaitu egin behar direla. Datarik ez du ezarri oraindik horretarako.
Jokalarien defentsa abokatuek beti argudiatu dute sexu harremanak izatea onartu egin zuela andreak, eta, beraz, ez zela deliturik egon. Grenobleko errugbi taldeak apartatu egin zituen hasieran akusatuak taldetik, behin-behineko neurri gisa. Epaituko dituzten hirurak beste talde batzuetan dabiltza gaur egun.