Kontratazio iruzurraren arazo nagusia behin-behinekotasun faltsua da. Eusko Jaurlaritzako Lan sailburu Maria Jesus San Josek gaur aurkeztu ditu Lan Ikuskaritzaren aurtengo lehen seihilekoko datuak, eta azaldu du urtarriletik ekainaren amaierara bitartean 3.067 kontratu aldatu dituela, berrikusitakoen %25. Aldaketa gehien-gehienak, %85, aldi baterakotasunaren iruzurra ezabatzeko izan da, eta, halako kasuetan, enpresak behartu dituzte langileei kontratu mugagabeak egitera. Gainerako kasuetan, %15etan, lanaldia luzatu dute.
"Lehenengo seihilekoan 12.348 kontratu berrikusi ditugu, eta, kontratazioan, joan den urteko aldi berean baino mila iruzur kasu gutxiago aurkitu ditugu", azaldu du San Josek. "Albiste ona da, eta urte amaieran joera hori baieztatzen bada, esan nahi du enpresaburuek, aldi baterako kontratuen gehiegizko erabilpena egiten badute ere, iruzur txikiagoa egiten dutela kontratazioan. Hori gertatzeko, uste dugu funtsezkoa izan dela lan iruzurraren aurka abiarazi dugun kanpaina", gaineratu du.
Sailburuak nabarmendu du langabezia murriztea dela Eusko Jaurlaritzaren helburua, "baina inoiz ere ez prekaritatearen kontura", zehaztu du. "Kalitatezko lanpostuak nahi ditugu, gure gazteei eta helduei beren bizitza proiektua garatzen laguntzeko".
Aldi baterakotasun faltsua
2016tik orain arte azken legealdian Lan Ikuskaritzak izandako emaitzak ere eman ditu sailburuak. Denera, ia hiru urtean, 13.000 kontratu aldatu ditu, eta horietatik 10.970, aldi baterako kontratu izateari utzi, eta mugagabe bihurtu dira; beste 1.936 kontratutan, berriz, lanaldia luzatu dute.
Azken seihilekoan, beraz, legealdiko joera berari eutsi dio kontratazioaren iruzurrak, eta enpresarien lege hauste nagusia, kontratazioaren alorrean, aldi baterakotasun faltsuarena da (aldaketen %85).
