Albistea entzun

Donostiako Zinemaldia

Hamalau lan Zinemaldiko Zuzendari Berriak saileko lehian

Europako, Amerikako eta Asiako ekoizpenak dira; tartean dago Maider Fernandez euskal herritarraren 'Las letras de Jordi' filma ere.

Maider Fernandezen pelikulako fotograma bat.
Maider Fernandezen pelikulako fotograma bat. Donostiako Zinemaldia Tamaina handiagoan ikusi

Miren Garate -

2019ko uztailak 30 13:20

Jose Luis Rebordinos Donostiako Zinemaldiko zuzendariak eta Idoia Elorbe Kutxabankeko ordezkariak gaur goizean aurkeztu dituzte zinemaldian Zuzendari Berriak sailean parte hartuko duten filmak. Zinema Eraikitzen 35, Glocal in Progress eta Ikusmira Berriak programetako saridunak daude horien artean, eta badago nabarmentzen den gai bat ere: familiako gatazkak eta seme-alaben eta gurasoen arteko harremanak.

Lehen edo bigarren filma duten zinemagileen lanak bildu ohi dira sail horretan, hori izaten da baldintzetako bat. Hautatuen artean zortzi opera prima daude, eta sei bigarren film. Hain zuzen, bigarren filma duten zuzendari horietako hiru aurrez ere egon izan dira Zuzendari Berriak sailean izendatuta.

Ignas Jonynasek (Vilnius, Lituania, 1971) Losejas lana erakutsi zuen 2013an, eta Nematoma ekarriko du aurten, dantza lehiaketa batean itsuarena egingo duen gizon bati buruzkoa. Lituanieraz filmatutako proiektu hori saritu egin zuten iazko Glocal in Progressen.

Svetla Tsotsorkova zuzendari bulgariarra (Burgas, 1977) Jadja lanarekin izan zen 2015ean, eta pelikulan parte hartu zuten Monika Naydenova eta Svetlana Yancheva aktoreekin lan egin du oraingoan ere Sestra izeneko lanean. Nerabe baten gezurretik abiatzen da istorioa, eta gezur horrek, ahizpa nagusiaren mundua suntsitzeaz gain, beren amari buruzko egia ezagutzeko aukera emango die.

Aurrez ere sail horretan parte hartu duen beste zuzendaria Delphine Lehericey  da (Lausana, Suitza, 1975). 1976. urtean Suitzako landa ingurua hondatu zuen lehortean kokatu du Le milieu de l'horizon, eta, egoera hori ardatz hartuta, familia ingurua eta inozentzia desagertzen ikusiko dituen gazte baten istorioa kontatzen du. Orain lau urte, Puppy Love erakutsi zuen.

Bigarren lana dute Jorunn Myklebust (Oslo, Norvegia, 1978) Jorge Riquelme (Santiago, Txile, 1981) eta Hinde Boujemaa tunisiarrak ere (1971).

Gerora arrakasta izan duten zuzendariak

Jakinekoa zen Maider Fernandez zuzendariaren (Donostia, 1988) Las letras de Jordi  Zuzendari Berriak sailean ariko zela, orain bi aste jakinarazi baitzuten antolatzaileek. Aurrez film laburrak ere egin izan dituen arren, lehen film luzea du, eta Ikusmira Berriak egoitza programan garatu du proiektua Fernandezek. Haren eta garuneko paralisia duen 51 urteko gizon baten arteko harremana jasotzen du.

Lucia Alamanyren La inocencia, Ana Garciaren Las buenas intenciones, Lee Jihyoungen eta Kim Solen Scattered Nigth, David Raboyren The Giant, Fyzal Boulifaren Lynn+Lucy, Koichi Doiren Yoake No Takibi eta Oren Gernerren Africa ere zuzendari horien lehen film luzeak dira.

1985. urtean sortu zuten Zuzendari Berriak saila, eta, besteak beste, Olivier Assayas, Nicolas Winding Refn, Laurent Cantet, Lucile Hadzihalilovic, Walter Salles, Kevin Smith, Lee Daniels, Ciro Guerra, Isabel Coixet, Alberto Rodriguez, Telmo Esnal eta Asier Altuna zinemagileek parte hartu izan dute ordutik. Halaber, irabazleak maiz aukeratu dituzte beste jaialdi batzuetarako, Euskal Herriko zinema aretoetan ere izan da haiek ikusteko aukera. Hain zuzen, Hiroshi Okuyamaren Jesus filma, 2018ko irabazlearena, joan den uztailaren 26an estreinatu zuten areto komertzialetan.

50.000 € da saria, eta film irabazlearen zuzendariaren eta Espainiako banatzailearen artean banatzen da erdi bana. Sail horretako filmak Gazteriaren saria lortzeko hautagai ere izaten dira.

Honako hauek dira film aukeratuak:

- Africa, Oren Gerner (Israel)

- Algunas Bestias, Jorge Riquelme (Txile)

- Disco, Jorunn Myklebust (Norvegia)

- La inocencia, Lucia Alemany (Espainia)

- Las buenas intenciones, Ana Garcia (Argentina)

- Las letras de Jordi, Maider Fernandez (Euskal Herria)

- Le milieu de l'horizon, Delphine Lehericey  (Suitza - Belgika)

- Le Rêve de Noura (Hinde Boujemaa, Tunisia, Frantzia, Qatar)

- Lynn+Lucy, Fyzal Boulifa  (Erresuma Batua - Frantzia)

-Nematona, Ignas Jonynas  (Lituania - Letonia - Ukraina)

- Scattered night, Lee Jihyoung, Kim Sol (Hego Korea)

- Sestra, Svetla Tsotsorkova  (Bulgaria - Qatar)

-The Giant, David Raboy (AEB, Frantzia)

- Yoake no takibi, Koichi Doi (Japonia)

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

dFeria jaialdiko antolatzaile eta sustatzaileak, gaur, Donostiako Viktoria Eugenia antzokian egindako aurkezpen agerraldian. ©Iñigo Uriz / FOKU

Oreka izango du ardatz aurtengo dFeria jaialdiak

Alex Uriarte Atxikallende

Arte eszenikoen dFeria jaialdia martxoaren 14tik 17ra bitartean egingo dute, Donostiako hainbat agertokitan. Festibala hasi baino bi egun lehenago, ‘pre-feria’ izeneko egitarau berezia izango da.

Lautan Hiru jaialdiaren antolatzaileak, gaur, Bilbon. ©Marisol Ramirez / Foku

Lautan Hiru antzerki jaialdia egingo dute laugarrenez Bilboko Zazpikaleetan

Olatz Enzunza Mallona

Euskaltzaindiak, Cafe Bar Bilbaok, Zazpi Katu gaztetxeak eta Bira kulturguneak antolatu dute egitaraua, elkarlanean, eta otsailaren 3an abiatuko da.

Antso Jakituna erregea eta Benjamin Tuterakoa bidaiaria elkarrizketan, Tuterako gazteluko ganberan. ©IÑAKET

Mundua Tuteratik zeharkatzea

Iñigo Astiz

Mikel Begoña gidoigileak eta Iñaki Martinez 'Iñaket' marrazkilariak XII. mendeko Nafarroa multikulturala irudikatu dute 'Benjamin Tuterakoaren bidaia aparta' komiki liburuxkan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.