Lucy Kennedy da Donostiako Klasikoa irabazi duen lehen emakumea. Ez da Euskal Herrian lortu duen lehenengo garaipena, joan den maiatzean, Durangoko Klasikoan ere gailendu baitzen. Txirrindulari australiarra ihes eginda heldu da helmugara, bigarren izan den Janneke Ensing herbeheretarrarengandik 23 segundora. Paulien Rooijakkers izan da hirugarren, minutu bat eta lau segundora.
Lehenengo euskal herritarra Lourdes Oiarbide asparrendarra izan da, seigarren postuan. Kennedyrengandik minutu eta 12 segundora zeharkatu du helmuga.
Kennedyk garaipen ikusgarria lortu du. Izan ere, Mendizorrotz mendatea, etaparen azken-aurreko gaina, lehen postuan igaro eta gero, gurpil bat zulatu du, eta atzean gelditu da. 127,1 kilometroko etaparen azken mendatean, baina, Murgileko aldapetan, Ensing harrapatzea lortu du, eta ihes egin dio, gainera. Azkenean, bera bakarrik helmugaratu da.
