KPI

Inflazioa %0,8an dabil oraindik ere, Hegoaldean

Uztailean, prezioak %0,4 merkatu dira, merkealdiaren eraginez.

Arropa denda bat, Elizondon.
Arropa denda bat, Elizondon. Kattalingorri

Iker Aranburu -

2019ko abuztuak 13

Inflazioak ez du gora egin nahi. Bigarren hilabetez jarraian, urte arteko tasa %0,8an geratu da, mailarik txikiena 2018ko urtarrilaz geroztik. Joan den urtearen zati handi bat %2tik gora egin ondoren, azaro-abenduetan berriro amildu zen, eta Europako banku Zentralak egokitzat jotzen duen "%2tik gertu baina azpitik" maila horretara iritsi ezinik dabil oraindik. Euroguneko azken datua, uztailekoa ere, %1,1 da.

Uztaila, ohikoa den moduan, prezioek behera egiten duten hilabetea izan da aurten ere. Arrazoia jantzi dendetan bilatu behar da: amaitu ziren merkealdi ofizialak, baina saltoki gehienek eskaintza bereziak egiten dituzte udan, aurretik saldu ez dituztenak saltzeko. Oinetakoak eta jantziak %14,1 merkatu dira uztailean Araban, %13,8 Bizkaian, %11,4 Nafarroan, eta %10,4 Gipuzkoan. Halaber merkatu dira elikagaiak eta etxeetarako gailuak. Horrekin konpentsatu dute berriro ere garraioa garestitu izana, erregaien prezioak uztailean izan duten igoeraren ondorioz (%0,3 eta %0,5. artean).

Urte arteko tasan, garraioek sortu dute inflazio handien (%2tik gora); etxebizitza, ura, gasa eta argindarra, ordea, merkatu egin dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna