Hondartzak

Bainatzea debekatu dute Zumaiako hondartza batean, Getariako batean eta Mutrikuko batean, uraren kalitate txarragatik

Erakundeek ohartarazi dutenez, uraren kutsadura mailak gehieneko kantitateak gainditu ditu, eta bandera gorria jarri dute.

Mutrikuko Saturraran hondartza, artxiboko irudi batean.
Mutrikuko Saturraran hondartza, artxiboko irudi batean.

Berria -

2019ko abuztuak 13

Gipuzkoako hiru hondartzatan bainatzea debekatu dute gaur, uraren kalitate eskasa dela eta. Bandera gorria ezarri dute Zumaiako Santiago hondartzan, Getariako Gaztetapen eta Mutrikuko Saturraranen.

Zumaiako Santiago hondartzan, Eusko Jaurlaritzako Osasun Sailak uraren kalitatea aztertzeko neurketak egin ditu. Zumaiako Udalak jakinarazi duenez, azterketaren emaitzek adierazi dute uraren kutsadura  gehiegizkoa dela, eta bainatzea debekatu dute.

Gurutze Gorriak abisu eman du Getariako Gaztetape hondartzan ere debekatuta dagoela bainatzea. Uraren kalitate txarrarengatik hartu dute neurria. Mutrikuko Saturraran hondartzan ere arrazoi berarengatik jarri dute bandera gorria, Gipuzkoako Foru Aldundiak jakinarazi duenez.

Astelehenean, Lapurdiko zenbait hondartzatan ere debekatu zuten bainua. Igande gauean ekaitzak jo zuen, eta erakundeek ohartarazi zuten urak gehiegizko kutsadura izateko arriskua zuela. Biarritzen, Bidarten, Donibane Lohizunen eta Hendaian itxi zituzten hondartzak, besteak beste.

Uztail bukaeratik dituzte arazoak Lapurdiko hondartzetan. Egun askotan bainua debekatuta eduki dute, euriteen eraginez araztegietako urak askatu baitituzte itsasora.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna