Migratzaileak

"Sufrimenduz beteriko" hamalau egunen ostean, Maltan lehorreratuko da 'Ocean Viking' itsasontzia

Guztira 356 migratzaile daramatza Mugarik Gabeko Medikuak eta SOS Mediterranee erakundeen itsasontziak. Europako Batasuneko sei herrialderen artean banatuko dituzte migratzaileak.

Migratzaile talde bat Ocean Viking' ontzian, joan den astean.'
Migratzaile talde bat Ocean Viking' ontzian, joan den astean.' HANNAH WALLACE BOWMAN HANDOUT

Nagore Arin -

2019ko abuztuak 23

Itxaronaldiak ilundutako esperantza piztu du Open Arms ontziaren porturatzeak. Hamalau egun daramatzate nazioarteko uretan, baina azkenean iritsi da erantzun bat Ocean Viking ontziko 356 migratzaileentzat ere, portu seguru batean lehorreratzeko baimen baten itxaronaldia dagoeneko amaituta. Maltako Gobernuak jakinarazi du albistea: Maltako portu batean lehorreratuko dira migratzaileak, eta, ondoren, Europako Batasuneko sei herrialderen artean banatu.

Frantzia, Alemania, Irlanda, Luxenburgo, Portugal eta Errumania agertu dira migratzaileak hartzeko prest. Hala jakinarazi du Joseph Muscat Maltako lehen ministroak: "Europako Batzordearekin eta hainbat herrialderekin eztabaidatu ostean, nagusiki Frantzia eta Alemaniarekin, Malta ere itsasontziak bizi duen geldiunearen irtenbidearen parte izango da". Sare sozialen bitartez jakinarazi du neurria. Hala, Maltako itsas armada arduratuko da 356 migratzaile daramatzan ontzia portu seguru batean lehorreratzen laguntzeaz. Muscat lehen ministroak azpimarratu duenez, Malta ez da migratzaileen kargu egingo.

Christophe Castaner Frantziako Barne ministroak ere egin ditu adierazpenak. Frantziak 150 migratzaile hartuko dituela jakinarazi du, eta "datozen egunetan" iritsiko direla. Hala, herrialdeak "elkartasunari eusten" jarraitzen duela nabarmendu du. Halaber, eskerrak eman dizkio Maltako Gobernuari, elkarrekin posible egin dutelako "Europako irtenbidea". Dimitris Avramopoulos Europako Batzordeko kideak ere hitzarmena goraipatu du, eta migratzaileen banaketa ahalik eta azkarren egiteko eskatu du: "Konpromiso hauek ahalik eta azkarren bete behar dira".

Mugarik Gabeko Medikuak eta SOS Mediterranee erakundeek ere ospatu egin dute albistea. Hala ere, hitzarmen bat galdegin dute: "Europako Batasuneko herrialde batzuek hondamendi humanitario honi irtenbide bat emateko erabakia hartu duten arren, beharrezkoa da lehorreratzeko mekanismo bat zehaztea, aurrez esateko modukoa". "Sufrimenduz beteriko hamalau egunen ondoren" iritsi da erabakia; izan ere, egoera gero eta ezegonkorragoa zen itsasontzian. Migratzaileak gero eta urduriago zeudela eta egoera gero eta korapilatsuagoa zela ohartarazi zuten erakundeek. Migratzaileen artean, gainera, 103 haur daudela nabarmendu zuten, haietako gehienak bakarrik.

Ontzia hilaren hasieran irten zen itsas zabalera, Libian gerratik ihesean ari diren migratzaileak erreskatatzeko asmoz. Abuztuaren 9 eta 12 artean egin zituzten erreskateak, eta, geroztik, itxaronaldi luze baten lekuko izan dira migratzaileak. Open Arms ontziaren porturatzeak, baina, esperantza piztu zuen. Euskal Herrian ere Aita Mari ontziak adierazi du itsasora irtengo dela berriz ere, erreskateak egiteko asmoz. Asteartean itsasoratzeko prest dute Aita Mari ontzia, hilaren 27an, baina erreskateak egiteko baimena lortzea dute xede orain. Espainiako Gobernuak Open Arms ontziari ezar diezazkioken isunei dagokienez, debekuak nazioarteko araudi oro apurtzen duela diote: "Delitu da laguntzarik ez ematea".

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna