Ostiralean Tabatingako kalean motoan zihoala, bi tiro jo zizkioten buruan Maxciel Pereira do Santosi, Folha de Sao Paulo egunkariak zabaldu duenez. INA sindikatuaren arabera, bere familiaren aurrean hil dute.
Sindikatu horrek dio hainbat tribu indigena bizi diren Javari harana defendatzen egin duen lanagatik hil dutela. Izan ere, erreserba natural horretan egiten diren legez kanpoko esku hartzeak salatzen aritzen zen Pereira do Santos; egurraren eta urrearen bila aritzen direnen kontra.
Hilketak indigenen alde egindako lanarekin zerikusirik ba ote duen ikertzen ari da Polizia, baina, berri agentzien arabera, oraingoz ez dute frogarik hipotesi hori baieztatzeko.
Amazoniako basoan dago Tabatinga, Brasil, Kolonbia eta Peruren arteko mugan. Gertu dago Javari harana, eta 6.000 indigena inguru bizi dira han, zortzi bat tributan banatuta.
Indigenen eskubideen alde aritzen direnen eskubideak babesteko eskatu dio INA sindikatuak Brasili.
