Urriaren 26an inauguratuko da, larunbatez, Donostiako Beldurrezko 30. Astea, Antzoki Zaharrean, El hoyo (2019) euskal filmaren proiekzioarekin. Basque Films etxeak ekoiztua eta Galder Gaztelu-Urrutiak zuzendua da filma.
Gaztelu-Urrutiak (Bilbo, 1974) zuzendu duen lehenengo film luzea da El hoyo —913 (2004) eta La casa del lago (2014) film laburren egilea da—. David Desolak eta Pedro Riverok idatzi dute gidoia, aurrenekoaren ideia batean oinarrituta, eta Ivan Massague, Antonia San Juan, Zorion Egileor, Emilio Buale eta Alexandra Masangkay dira protagonistak.
Bestalde, Hideo Nakata zuzendari japoniarrak lehen aldiz bisitatuko du Donostia. Sadako aurkeztera dator, The Ring saga eguneratzen duen bere pelikula berria. Beldurrezko generoko zuzendari japoniar gailenetako bat da Nakata 1998an The Ring fundazionala zuzendu zuenetik, eta, beste hainbat filmen artean, berak zuzenduak dira Dark Water (2002), Kaidan (2007), The Complex (2013) eta Ghost Theater (2015).
Sail Ofizialean erakutsiko dituzten film batzuk aurreratu ditu Beldurrezko Asteak:
Amigo (2019). Oscar Martin. Espainia
Bliss (2019). Joe Begos. AEB
Bullets of Justice (2019). Valeri Milev. Kazakhstan-Bulgaria
Darlin’ (2019). Pollyanna McIntosh. AEB
It Comes / Kuru (2019). Tetsuya Nakashima. Japonia
Little Monsters (2019). Abe Forsythe. Australia
The Pool (2018). Ping Lumphapleng. Thailandia
Rabid (2019). Jen Soska, Sylvia Soska. Kanada
The Room (2019). Christian Volckman. Frantzia-Belgika-Luxenburgo
Sadako (2019). Hideo Nakata. Japonia
Vivarium (2019). Lorcan Finnegan. Belgika-Irlanda-Danimarka
