Lan harremanak

Panificadora Alavesak 100.000 euro pagatu beharko dizkio langile bati, jazartzeagatik

EAEko Justizia Auzitegi Nagusiak ebatzi du enpresak "langilearen interesen aurkako jarrera argia" izan duela, eta "lan harremanari kalte egiteko helburua".

Ogia egiten ogi lantegi batean.
Ogia egiten ogi lantegi batean. BERRIA

Xabier Martin -

2019ko irailak 12

E.M.R. ez da jadanik Panificadora Alavesako behargina. Urte askoan haren aurka aritu zen zuzendaritza, "lan harremanari kalte egiten". Orain, EAEko Justizia Auzitegi Nagusiak langilearen alde eta enpresaren aurka ebatzi du. Panificadora Alavesak 99.994,94 euro ordaindu beharko dizkio langileari kalte-ordain gisa, "langilearen interesen aurkako jarrera argia" izan duelako; jazarpena egin diolako, alegia. Gasteizko enpresa horretako behargina zen 1987az geroztik E.M.R.

CCOO sindikatuak ezagutarazi du ebazpena, eta, bertan jasoa dagoenez, enpresak modu larrian urratu ditu langilearekiko zeuzkan eginbeharrak, eta hark maiz jo behar izan du auzitara, lan baldintzetan aldaketak inposatu dizkiotelako, oporretan, eskatu dizkioten diru kopuruetan eta ezarritako zigorretan. Enpresa langilearen aurka tematu dela dio epaiak, eta ez dizkiola onartu bere eskubideak desadostasunak auzitara iritsi ez diren bitartean.

Ertzantzara jo zuen

Are gehiago, enpresak lantaldea elkartu zuen behin gutun bat ozen irakurtzeko eta E.M.R. beharginaren jarduna gutxiesteko. Bere lan errendimendua "nahita" apaldu zuela zioen gutun horrek, ekoizpenaren kalitateari kalte egiten ziola, eta akats ugari egiten zituela. Era berean, lanorduetan "paseotxo" gehiegi egiten zituela egotzi zion zuzendaritzak. Batzar horrek eragindako tentsioak bultzatuta, E.M.R. langileak bilkura utzi eta Ertzantzara jo zuen.

CCOO sindikatuak ohartarazi du "horrelako praktikak" egiten dituzten enpresek auzitan bukatuko dutela, iritzi publikoak ezagutu egingo dituela, "jarrera horiek ez dutelako etikarik, abusua besterik ez direlako". Enpresa guztietan "tratu etikoa" eskatu du sindikatuak langileentzat.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna