Donald Trump AEBetako presidenteak John Bolton Segurtasun Nazionalerako aholkulari postutik kendu zuen joan den astean, eta egun batzuk geroago izendatu du haren ordezkoa. Twitter bidez eman du albistea. Robert O'Brien izango da Trumpen laugarren Segurtasun Nazionalerako aholkularia. 2017ko urtarrilaz geroztik hiru kaleratu ditu: Michael Flynn, H. R. McMaster eta Bolton.
Segurtasun Nazionalerako aholkulari karguak ez du kongresuaren onespenik behar izendatua izateko, eta presidenteak berak aukeratzen du zuzenean. Atzerriko gaiei dagokienez, administrazioan garrantzi handiena duen postuetako bat da. Heldu beharko dio bai migrazio politikari, bai AEBen eta Iranen arteko tentsioari, besteak beste.
Estatubatuar bahituen auzietarako Washintongo goi funtzionarioetako bat izan da O'Brien azken urtean. AEBetako hedabideen arabera, Trump aho bete hortz geratu da negoziazioetarako daukan abileziarekin.
Segurtasun Nazionalerako aholkulari berria AEBen ordezkaria izan zen NBE Nazio Batuen Erakundearen Batzar Nagusian (2005-2006), George W. Bush herrialdeko presidente zen garaian. Obamaren aurreneko legegintzaldian ere administrazioko kidea izan zen (2009-2013).
