Gastronomia

Mundu biraren bosgarren mendeurrena landuko dute Gastronomika biltzarrean

Etzi hasiko da San Sebastian Gastronomikaren XXI. aldia, eta, aurtengoan, Juan Sebastian Elkanoren lehen mundu bira izango du hizpide. Carme Ruscalleda sukaldariak jasoko du Omenaldi Saria.

Gastronomika biltzarraren aurkezpena Basque Culinary Center unibertsitatean, gaur goizean.
Gastronomika biltzarraren aurkezpena Basque Culinary Center unibertsitatean, gaur goizean. Jon Urbe / Foku

Nagore Arin -

2019ko urriak 4

Igandean hasiko da San Sebastian Gastronomika biltzarraren XXI. aldia, eta datorren asteazkenera arte izango da. Aurtengoan, Juan Sebastian Elkanoren lehen mundu biraren bosgarren mendeurrena izango dute hizpide. Hiru urteko bidaia horretan eskifaia kideek topatu zituzten elikagai eta produktuetan jarriko du arreta biltzarrak, mundu biraren aromen eta zaporeen bila.

Hala, Elkanoren eskifaiak eginiko ibilbidea hartuko dute kontuan, Getariatik (Gipuzkoa) hasi, Espainiara jauzi egin, eta Brasil, Argentina, Txile, Filipinak eta Indonesia igarota, berriz ere Euskal Herrira itzultzeko. Horretarako, nazioarteko hainbat ordezkari bilduko dira Donostiako Kursaalean, tokian tokiko jakiak erakusteko. Nazioarteko ordezkariak ez ezik, Euskal Herriko sukaldariak ere izango dira; besteak beste: Andoni Luis Aduriz, Josean Alija, Hilario Arbelaitz, Karlos Argiñano, Juan Mari Arzak, Eneko Atxa, Martin Berasategi eta Pedro Subijana.

Biltzarraren XX. aldian, Juan Mari Arzak sukaldariak jaso zuen Omenaldi Saria, eta, aurten, Carme Ruscalledak jasoko du sari hori. Zazpi Michelin izar ditu, eta ,Bartzelonako Sant Pau jatetxea itxi eta urtebetera, berriz ere itzuliko da Kursaalera. Hizlari gisa izan da beste urte batzuetan, eta, oraingoan, sektorearen eta gertuko jendearen saria jasotzera etorriko da.

Pintxoen biltzarra

Urtez urteko jarduerak ez ezik, izango dira berrikuntzak ere; kasurako, Pintxoen I. Biltzarra. Asteazkenean izango da, urriaren 9an, eta dozena bat profesional igoko dira Kursaaleko Ganbera Aretoko agertokira. Pintxoen, barren, taberna ilustratuen, eta, oro har, miniaturazko sukaldaritza proposamenen formatu berri guztien sektoreari balioa emateko asmoz antolatu dute.

Goizetik eguerdira arteko egitaraua antolatu dute, eta, besteak beste, pintxoen bilakaera, pintxoak hutsean ontziratuta, koktel eta cateringerako miniaturazko sukaldaritza, ardoen kudeaketa barran eta pintxoak hartzen ibiltzearen ohitura tradizionalaren ikuspegi garaikidea jorratuko dituzte.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna