Merkataritza gerra

EBk %66rainoko tarifak jarri dizkie Txinaren altzairuzko gurpilei

Europako Batzordeak uste du Txinako ekoizleek kostu azpiko prezioetan saltzen dituztela.

Continental markako gurpil bat, Hannoverren.
Continental markako gurpil bat, Hannoverren. Focke Strangmann / Efe

Iker Aranburu -

2019ko urriak 10

Merkataritza gerrak frontea du Atlantikoan, frontea du Pazifikoan, baina baita Eurasian ere. Oraingoz, txikiagoa da gatazka hori, altzairura mugatzen baita. Hain zuzen ere, Txinako altzairuzko gurpilen inportazioa zergapetzea erabaki du Europako Batasunak, uste baitu kostu azpiko prezioetan ari direla Europan saltzen. %50,3ko muga zerga ordaindu beharko dute Zhejiang Jinguk, Xingmin Intelligent ek eta beste hamazazpi ekoizleren gurpilek, eta %66,4koa besteek.

Berez, Donald Trumpek abiatutako merkataritza gerrekin du lotura altzairuzko gurpilen auziak. AEBetako presidenteak, bere altzairugileak babesteko, %25eko tarifak ezarri zizkien altzairu inportazioei. Horrek eragin du Txinako ekoizleak beste merkatu batzuk bilatzea bere produktuetarako, haien artean Europako Batasuna. Kontua da, Bruselaren arabera, auto, kamioi eta traktoreentzat altzairuzko gurpilak egiten dituzten Txinako enpresek dumping egin dutela, hau da, kostu azpiko prezioan saldu dituztela beren produktuak.

Europako Gurpil Egileen Elkartearen salaketa baten ondotik hasi zuen ikerketa Europako Batzordeak, joan den otsailean. Elkarte horrek dio txinatarrek merkatuaren %5,3 bereganatua dutela jada, 2015ean zutena halako bi. Muga zergak gaur jarriko dituzte indarrean, eta gutxienez sei hilabetez izango dira indarrean.

Baina gurpilei buruzkoa ez da EBk eta Txinak altzairuzko produktuetan duten norgehiagoka komertzial bakarra. Batzordeak jakinarazi du ikerketa bat zabalduko duela jakiteko Pekinek laguntza ekonomiko zuzena eman ote dien altzairuzko bobinak egiten dituzten ekoizleei. Beste hainbat produktu txinatarrek dagoeneko ordaintzen dituzte tarifak.

Bilera, Washingtonen

Pekingo agintariak gehiago kezkatzen ditu AEBekin duten gatazkak EBrekin dutenak baino, ekonomiaren hazkundea moteldu diotelako. Datorren asteartean inportazioen erdiei muga zerga %25etik %30era igoko die Trumpek, gaur hasitako azken orduko negoziazioek gatazka konponbidean jartzen ez badute. Washingtonen dago Liu He Txinako lehen ministrordea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Ekonomia %9,5 txikitu zen 2020an Araban, Bizkaian eta Gipuzkoan

Iker Aranburu

Erorikoa kalkulatu baino txikiagoa izan denez, errebotea ere txikitu du Jaurlaritzak: %8,6ko hazkundea, aurten. 25.700 enplegu galdu ziren
Festa bat Wuhan hiriko igerileku batean, COVID-19a garaitu dutela ospatzeko, joan den abuztuan. ©STR / EFE

Txinak ez du atzera egiten

I. Aranburu

Pandemiaren sorburua izan arren, Txina %2,3 hazi zen iaz, industria esportatzailearen eskutik
Ororbiako Kybseren kanpoaldea. Ibilgailuentzako motelgailuak ekoizten dituzte. ©IÑIGO URIZ / FOKU

Kybsek erretiro aurreratuak eskaini ditu, kaleratzeak atzera bota ostean

Joxerra Senar

Zuzendaritzak langileen batzordeari proposatu dio 60 urtetik gorako langileei erretiroa ematea, eta borondatez enpresa utzi nahi dutenei lan egindako urteko 45 eguneko kalte-ordaina eskaini diete

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.