Greba egitera deitu dituzte asteazkenerako Ikor enpresako langileak, azken asteetan gertatu diren 21 kanporatzeak salatzeko. Langileak berriro hartzeko eta konpainiaren arazoei irtenbide negoziatua emateko eskatu du enpresa batzordeak.
Ikor 1981. urtean sortu zuten, eta Donostiako Zuatzu enpresa parkean du egoitza. Zirkuitu elektronikoen diseinurako eta fabrikaziorako zerbitzuak egiten ditu. 800 langile inguru ditu, eta Donostian ez ezik, Txinan eta Mexikon ere lantegiak ditu. Joan den maiatzean, Alemaniako Ebm-past multinazionalaren esku geratu zen. Ebm-past duela hiru urte sartu zen Ikorren, akzioen %50 erosita.
Ikorreko enpresa batzordeak agiri baten bitartez jakinarazi duenez, urriaren 24ean enpresak erabaki zuen zortzi langile kanporatzea Donostiako egoitza nagusian. Urriaren 30ean, berriz, ITC zentro teknologikoko behargin bat eta Sistemas Electronicos adarreko hamabi bota zituen. Langile horiek gehienek enpresan urte asko egin dituztela ziurtatu du enpresa batzordeak, eta. deitoratu du zuzendaritzak ez dituela alternatibak proposatu, hala nola, erretiro aurreratuak, diruz lagundutako kontratu eteteak eta langileak beste leku batzuetan kokatzea.
Ikor taldeak «bizi duen egoera» ez dela langileen errua ziurtatu du enpresa batzordeak. Arduradunak zeintzuk diren argitzeko eskatu du, eta elkarrizketa prozesu bat hasteko, «langileei ahalik eta kalte txikien» eragingo liokeen irtenbide bat bilatzeko, inor kaleratu gabe.
Protesta gisa, egun osoko greba egingo dute etzi. Goizean, Zuatzuko lantegiaren aurrean batuko dira, eta gero Errotaburuko biribilgunera joango dira, eta handik Gipuzkoa plazara. Ostegunean eta ostiralean bi orduko lanuztera ere deitu dute.
Arriluceakoak, Jaurlaritzarekin
Ikor baino egoera are larriagoan dago Arrilucea enpresa,Igorren (Bizkaia). Izan ere, lantegia itxi eta 141 langileak kalean utzi nahi ditu haren jabeak, Batz kooperatibak.
Araluceko langileak Batzen egoitzaren aurrean elkartu dira gaur, eta berdin egin nahi dute asteazkenean eta ostegunean. Bihar, berriz, bilera dute Eusko Jaurlaritzarekin. Eskatuko diote bitartekari lana egin dezan Batzekin, fabrikari itxiera ez den irtenbide bat bilatzeko. Salatu dutenez, Batzek ez du zuzenean haiekin hitz egin.
