Nafarroa Arenak berak zabaldu du albistea, Twitterreko kontuaren bidez. Txioan jarritakoaren arabera, "taldearen produkzioaren ezarpena eta oholtza berrikusi ondoren" erabaki dute harmailetako eremua handitzea, eta, beraz, sarrera gehiago salgai jartzea. 25 eurotan jarriko dituzte eskuragai, Nafarroa Arenako txarteldegian. Oraingoz ez dute zehaztu zenbat pertsona gehiagorentzako lekua izango den, ezta aretoko zein eremutarako izango diren ere.
OHARRA!
— Navarra Arena I Nafarroa Arena (@navarrarena) November 11, 2019
Azaroaren 22 eta 23an BTX taldearen produkzioaren ezarpena eta oholtza berrikusi ondoren, harmailetako eremua handitu dugu. Azken sarrerak salgai (25 €), Nafarroa Arenako lehiatiletan bakarrik, azaroaren 12an (asteartea) 11:00etatik 14:00ak arte. Pertsonako 4 sarrera.
Berri Txarrak taldea 1994an sortu zen, Lekunberrin (Nafarroa), eta iazko urtea amaitu baino lehen iragarri zuen 25 urteko zikloa itxi eta "etenaldi mugagabea" hartzeko asmoa. Ikusi Arte Tour 2019 birarekin aritu dira ordutik zaleak agurtzen; tartean, hiru orduko kontzertu bat eman zuen udan, Kobetamendin, 20.000 zaleren aurrean eta hainbat lagunekin batera. Hilabete lehenago, ekainean, Adarra saria ere jaso du zuen taldeak, Donostia Kulturaren eskutik. Gorka Urbizu taldeko abeslariari elkarrizketa egin zion orduan BERRIAk.