Bidasoak aukera izango du Txapeldunen Ligako final-zortzirenetan jokatzeko, horren atariko kanporaketarako sailkatu delako. C multzoko zortzigarren jardunaldian, irabazi egin dio Finlandiko Cocksi, haren pistan, eta, Savehof bigarren sailkatuak galdu egin duenez Eurofarm Rabotniken etxean, ziurtatu egin du sailkatzea.
Bi jardunaldi falta dira multzoen fase hau amaitzeko, eta, orain, gipuzkoarrek lehen postuari heldu nahiko diote. Bigarren Sporting Lisboa da orain, eta hiru puntu atzetik dauka. Irunen izango dira portugaldarrak datorren larunbatean (16:00), eta multzoko lehen postua izango dute jokoan. Hori lortzeko, euskal herritarrek nahikoa dute berdinketa.
Gaurko partidaren lehen zatia gol gutxikoa izan da. Etxekoek bederatzi minutu behar izan dituzte aurreneko gola sartzeko, Xoan Ledo Bidasoako atezainak sekulako lana egin duelako, besteak beste. Atsedenaldira heltzeko bi minutu fata zirela, Bidasoak bost golen aldea zeukan, baina, finlandiarrek tartea murriztea lortu, eta lehen zatia 9-12koarekin amaitu da.
Bigarren zatiaren bigarren erdian hautsi du partida Jacobo Cuetararen taldeak, 50. minutuan hamar golen aldearekin zelako. Horrela bukatu da partida, hamar golen tartearekin Euskal Herriko taldearen alde.
FITXA
Cocks: 18 (9+9): Shitsko, Lukyanchuk (1), Syrjälä, Memic,
Tamminem (5, 2p), Nenita (3), E. Semenov (1) –hasierako zazpikoa–,
Markelav , Kreicbergs (1), Zuparijac, Rönnberg, Y. Semenov (4),
Puljizovic eta Gugleta (3).
Bidasoa: 28 (12+16): Ledo, Cavero (3), Orbovic (2),
Zabala (1), E. Salinas (1), De la Salud (3), Renaud-David (7) –hasierako zazpikoa–, Rangel, Crowley (1), Odriozola (7, 2p), Serrano (3),
Barthe, Azkue, Tesoriere, Da Silva eta Seri.
Markagailua: 0-2, 1-4, 3-6, 5-7, 6-9, 9-12
(atsedenaldia); 12-15, 13-17, 15-21, 16-25, 17-27 eta 18-28 (bukaera).
Epaileak: Manea eta Iliescu (Errumania).
