Itsas Salbamendu Humanitario GKE gobernuz kanpoko erakundearen ontziak Maltak edo Italiak lehorreratzeko baimena eman zain jarraitzen du. Bi herrialdeetako gobernuei egin die eskaera, eta azken orduetan jakinarazi dutenez, hango agintariekin koordinatuta ari dira lanean. Baina Iñigo Mijangos GKEaren presidenteak gaur adierazi duenez, «momentuz» baimenik gabe segitzen dute.
Mijangosen esanetan, bihar, «lehen orduan», iritsiko nahiko lukete Sizilia uhartearen (Italia) ekialdera. Adierazi du migratzaileak, «erlatiboki» bada ere, «egoera onean» daudela.
