Kirola

Erremonte txapelketa


Binakako Txapelketa

Urriza une egokian itzuli da

Urriza eta Larrañagak 33-40 gainditu dituzte Juanenea eta Barrenetxea IV Binakakoaren Txapelketan

Urrizak partida borobila jokatu du.
Urrizak partida borobila jokatu du. Maialen Andres

Iñigo Goñi Iradi -

2019ko azaroak 28

Urrizak eta Larrañagak 33-40 irabazi diote Juanenea eta Barrenetxeari Binakako Txapelketako bigarren jardunaldia ixten duen partidan. Urriza onenaren itzulerak markatutako partida izan da eta une egokian iritsi kalitate jauzia emateko. Iruñeko aurrelaria izan zen protagonista nagusia, 21eko berdinketatik aurrera.
Ordura arte ia tanto guztietan berdintzen zuten bi bikoteek. Gero, 23-26, 25-30, 29-39 aurreratu  ziren urdinak eta gorriek 4-1eko partzial txiki batekin zero puntutan geratuko zirela zirudienean, Juanenea eta Barrenetxea IV.ak puntu bat berreskuratu zuten. Urrizak 25 tanto ere egin zituen, ezker pareta asko ukituz, zortzi bi pareta eginez. Bikotea gidatu zuen bi akatsekin eta Urriza onenaren zenbakiak dira horiek. Ahal zituen puntu guztiak batu zituen, zortzi, partidako lau eta aurrelari onena izateagatik beste lau.

Larrañagak oso ondo atera zuen, eta zazpi tanto egin zituen sakearekin. Gainera, partidako lehen tantoa eta azkena egin zituen bederatzi tanto batuz partidan. Bost huts egin zituen piloteoan, eta sakez falta bat. Barrenetxeak bi tanto baino ez zituen egin sakean, baina bederatzi piloteoan. Hernaniarrak hiru akats baino ez zituen egin eta, beraz, bost puntu batu zituen, lau bakarkako puntuaketan eta bat 33 tantotan geratzeagatik. Juanenea hamalau tantotan geratu zen, eta hiru akats egin zituen.
Zenbaki horiekin Urrizak zortzi puntu batu zituen, Larrañagak sei, Barrenetxeak bost eta Juaneneak hiru puntu.

Eta bigarren jardunaldia amaitu ondoren Uterga da aurrelarien sailkapeneko buru 16 punturekin, Urriza hirugarren jarri da hamar punturekin eta Juanenea lau punturekin dago, finalaurrekoetatik kanpo. Atzelarien artean Azpiroz da liderra 14 punturekin, Barrenetxea IV.a hirugarren da hamaika punturekin eta Larrañaga bosgarren da zortzi punturekin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna