Euskara

Nafarroako Parlamentuaren domina jaso du Euskaltzaindiak

Ehun urtean "euskararen batasunerako eta normalizaziorako" eginiko lanagatik saritu dute Euskaltzaindia.

Iosu Alberdi -

2019ko abenduak 2

Bere ehungarren urteurrena ari da ospatzen Euskaltzaindia, eta zenbateko borobil hori aintzat hartuta, Nafarroako Parlamentuaren Domina eman dio erakunde horrek euskararen hizkuntza akademiari. Haren "ibilbide akademikoa eta historikoa" saritu nahi izan ditu; batez ere, "euskararen batasunerako eta normalizaziorako" eginiko lana. Euskaltzaindiako presidente Andres Urrutiak adierazi du erakundea "politikatik at" aritu dela lanean: "Ulertzen dugu euskara herriaren ondarea dela. Denon ondarea, ezin dena ez instrumentalizatu, ez monopolizatu".

Nafarroako Parlamentuko presidente Unai Hualdek adierazi du aho batez hartutako erabakia izan dela, eta horrek "are bereziago" egiten duela errekonozimendua. Euskaltzaindia "guztiok batzen gaituen hizkuntzarentzat" jaiotako erakundea dela azpimarratu du Hualdek, eta gehitu du espero duela gaurkoa "hizkuntza politiketan akordio zabalak" lortzeko bidearen hasiera izatea. Parlamentuko presidentearen esanetan, beharrezkoa da "euskararen normalizaziorako pausoak ematen jarraitzea", ezin delako euskara "erlikia" gisa begiratu: "Egongo da atzerapena desiratzen duenik. Gizartean, ordea, bere presentzia gero eta handiagoa da, kaleetan eta komunikabideetan".

Ekitaldian izan dira, besteak beste, Nafarroako presidente Maria Chivite, eta Arabako, Bizkaiko eta Gipuzkoako ahaldun nagusiak. Erakunde horien lana eskertu du Urrutiak, 1919an Euskaltzaindiaren sorreran izaniko rolagatik. "Domina hau jasotzen dut akademiko guztien izenean, Artura Campionetik Jose Mari Satrustegira", amaitu du Euskaltzaindiako presidenteak. Akademiko horien artean 70 nafar daude.

Ekitaldiari Julio Sotoren bertso batek eman dio amaiera. Euskararen aldeko aldarria egin du bertsolariak.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna