Lehengaiak

Errusiak bat egin du petrolio gutxiago merkaturatzeko LPEEren erabakiarekin

Lurralde Petrolio Esportatzaileen Erakundeak eta aliatuek milioi erdi upel gutxiago ekoitziko dituzte, eta Saudi Arabiak segi egingo du bere 400.000 upeleko borondatezko murrizketarekin, beste kideei presio egiteko hitzemandakoa bete dezaten

Khurais petrolio putzua, Saudi Arabiako basamortuan.
Khurais petrolio putzua, Saudi Arabiako basamortuan. ALI HAIDER / EFE

Irune Lasa -

2019ko abenduak 6

«Ez dut prezioez hitz egin nahi». Ziurrenez, nahi duenaz bakarrik hitz egitera ohituta egongo da Abdulaziz bin Salman, Saudi Arabiako Energia ministroa. Gaur arratsaldean «merkatuaren egonkortasunaz» hitz egin nahi zuen, LPEE Lurralde Petrolio Esportatzaileen Erakundeak eta Errusiak Vienan hartutako erabakien berri ematean.

Hitzak hitz, upelaren prezioa da esportatzileen kezka nagusia azken urteetan. 2016an upela 40 dolarretik behera amildu zenean, ekoizpena murriztu behar izan zuten prezioak berreskuratzeko. Eta orain gauzak ez dituzte hobeto: 2020 hasieran petrolio eskari globala eguneko 1,1 milioi upeletan haziko dela uste dute LPEEk eta Errusiak. Baina eskaintza da haien egiazko arazoa, AEBetako eskisto petrolio asko merkaturatuko delako. Gauzak horrela, jada 1,2 milioi upeletan murriztutako ekoizpenari beste milioi erdi upel kenduko dizkiote LPEEk 360.000 upel gutxiago merkaturatuko ditu eta aliatuek gainerakoak —Errusiak 70.000 upel—.

Hori bai, Saudi Arabiarentzat lehentasuna beste kideek hitza betetzea da. Edo behintzat murrizketa sinesgarria izatea merkatuarentzat. Horregatik, oraingo gutxitzetik tokatzen zaion 167.000 upeleko murrizketari urte hasieratik indarrean duen 400.000upeleko «borondatezko murrizketa» gehituko dio. Ondorioz, orotara murrizketa 2,1 milioi upelekoa izango da.

Kuoten murrizketatik kanpo jarraituko dute LPEEko hiru kidek, Irakek, Libiak eta Venezuelak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna