ETB

'Ihesaldia'-k %2,1eko batez besteko ikusle kuota izan du

Helduentzako euskarazko aurreko telesaila Eskamak kentzen izan zen (2016), eta %2,5eko ikusle kuota bereganatu zuen. ETB1en abenduko batezbestekoa %1,9koa da.

Telesailaren fotograma bat
Telesailaren fotograma bat Pausoka Tamaina handiagoan ikusi

Urtzi Urkizu -

2019ko abenduak 20 13:34

Hiru urte eta erdiz ETBk ez du helduentzako euskarazko telesailik eman. 2016ko maiatzean eman zuen Eskamak kentzen telesailaren azken atala, eta Ihesaldia iritsi den arte basamortu luze bat izan da. ETBko zuzendari Edu Barinagak iragarri du datorren urtean hiru telesail berri egingo dituztela.

Ihesaldia abenduaren 15etik 19ra eman dute ETB1en, bost atalak errenkadan. Atal guztiak ikusgai daude EITBren webgunean.

Abenduaren 9an, EHUko Ikus-entzunezko Graduko ehun ikaslek —euskarazko zein gaztelaniazko adarretakoak— lehen atala ikusi zuten. Inkesta bat egin zuten haiekin Applika ikerketa taldearen eskutik, eta esan zuten asko gustatu zitzaiela telesaila.

Hainbat alorretatik kritikatu dute azkeneko urteetan euskarazko telesailen falta. Baina premia horrek ez du izan islarik ikusle datuetan. Ihesaldia-k batez beste 16.000 ikus-entzule izan ditu Araban, Bizkaian eta Gipuzkoan (%2,1eko ikusle kuota). Azaroan ETB1ek %2,2ko kuota bereganatu zuen, eta abenduan, orain arte, %1,9koa du batez beste. Bada Ihesaldia-ren inguruko datu kezkagarri bat, gainera: 25 eta 44 urte arteko herritarren artean %0,5eko ikusle kuota izan du telesailak. Hobea izan da datua 13-24 urte arteko gazteen artean: %2,6koa.

Eskamak kentzen-ek (21.250 ikusle batez beste) baino datu txikiagoak izan ditu euskarazko fikzio berriak. Baina, 2015eko udazkenean, ETB1ek Aitaren etxea telesaila —1950eko hamarkadan girotua— eman zuen, eta lan hori Ihesaldia-ren datuetatik behera ibili zen.

Pausokaren balorazioa

Xabi Zabaleta Ihesaldia telesaileko gidoilari eta ekoizle eragileak balantze ona egin du: «Lan ona egin dugula uste dugu; egin diren ikerketetan emaitzak oso onak izan dira, eta kanpoan erakutsi dugunean harrera oso ona izan da. Gainera, dagoeneko badaukagu nazioarteko salmentetan arituko den banatzailea, lehen bi atalak ikusi ondoren akordioa sinatu genuen eta». Zabaletak gogorarazi du irailaren 23an hasi zituztela grabaketak, eta hiru hilabete eskasean amaitu dutela fikzioa. «Jakina, audientzia gehiago izatea gustatuko litzaiguke, baina gaur egun telesailen bizitza ez da lehen pasera mugatzen, eta ziur gaude Ihesaldia-k poztasun bat baino gehiago emango dizkigula». Itxaropenezko hitzak egin ditu Zabaletak: «Espero dugu etorriko diren euskarazko beste telesailentzako bidea irekitzen lagundu izana, euskaraz kontsumitzeko ohitura falta nabaria baitago. Ohitura horiek berreskuratzeko urteak eta proiektu erakargarriak beharko dira, unean uneko emaitzei gehiegi begiratu gabe».

Pausoka ekoiztetxea beste telesail bat egiten ari da ETBrentzat: Go!azen. Neska-mutikoei zuzendutako telesailak denboraldi honetan %4,3ko ikusle kuota izan du oraingoz. Gaur gauean denboraldiko laugarren atala emango dute.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Aitor Ahedo eta Patricia Martinez Malen alabarekin. ©JAIZKI FONTANEDA / FOKU

«Asko ikasi dugu familian bidaiatuz»

Jone Arruabarrena

Ahedok hainbat bidaia egin izan ditu familiarekin, eta, azkenekoz, Txinan eta Vietnamen izan dira. Egonaldi horren inguruan eta familian bidaiatzeaz hitz egingo du bihar Gasteizen.
 ©JAGOBA MANTEROLA - JUAN CARLOS RUIZ / FOKU

Askatasunez jantziak

Iker Tubia

Gizonentzako jantzia ere izan liteke gona edo soinekoa. Bilbon mutil batek arazoak izan ditu ikaskideekin eta irakasle batzuekin institutura gona jantzita joateagatik. Norberak nahi duen bezala janzteko muga izaten da gizartearen begirada zorrotza.
 ©BERRIA

«Epaiketan gertatutakoa oinarritzat erabili genuen telesail guztia sortzeko»

Gurutze Izagirre Intxauspe

ETBko 'Altsasu' telesailari azken ukituak ematen ari da, datorren astean hasiko baita. Lau urteko prozesua lau ataletan kontatzea izan da zailtasunetako bat, fikzioaren eta errealitatearen arteko orekaz gain.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna