Albistea entzun

Merkataritza

ELAk lanuzteak egingo ditu etzi Nafarroan, saltokiak igandeetan irekitzearen aurka

Langileen atsedenerako eskubidea aldarrikatuz, elkarretaratzeak egingo ditu igande goizean Iruñeko Karlos III.a etorbidean eta Uharteko Itaroa merkataritza gunean.

ELAren agerraldian, Olaia Alonso, AInhoa Urkia eta errege magetako bat, sektoreen langileen gutunak eskuan
ELAren agerraldian, Olaia Alonso, AInhoa Urkia eta errege magetako bat, sektoreen langileen gutunak eskuan Iñigo Uriz / Foku

Joxerra Senar -

2020ko urtarrilak 3

Errege magoek ere bat egin dute aldarrikapenarekin. «Egunotan nahiko lanpetuta gaude, baina sektoreko langileen gutun guztiok argi adierazten dute ez dutela urtarrilaren 5ean lan egin nahi. Saltoki handietako ateak irekita, langileen baldintzak okertzen ditu, eta haien eskubideak urratzen». ELAren prentsa aretora sartu da hiru errege magoetako bat, eta babesa adierazi dio sindikatuaren aldarrikapenari, «justifikatuta dagoelako».

Igande honi begira, Itaroako Hipercor saltoki handiak ateak ireki nahi ditu 22:00etara arte, egun osoan, eta, ondorioz, merkataritza gune hori irekita egongo da. Horregatik, ELAk elkarretaratzea egingo du bertan, 12:00etan. Iruñean, Karlos III.a etorbidean egingo dute beste protesta, saltoki handi ugari biltzen baitira bertan. Lehenik eta behin, zabalik egoten diren saltokietan egoeraren inguruko informazioa banatuko dute. Era berean, sektoreko langileek urte honi begirako nahiak eta asmoak utziko dituzte etorbidearen erdialdean dagoen Eguberrietako zuhaitzean. Azkenik, 12:30ean elkarretaratzea egingo dute Gurutzeko plazan. Iruñerri hegoaldean, Cordovillan, Morea gunea ez dute zabalduko.

Nafarroako 2001eko merkataritza legeak aukera ematen du urteko jaiegun jakin batzuetan irekitzeko, eta, aurtengo, Nafarroako Merkataritza Kontseiluak hamar jaiegun proposatu ditu, tartean urtarrilaren 5a. Beste jaiegunak hauek dira: martxoaren 9a, apirilaren 9a eta 10a (Aste Santua), uztailaren 5a, abuztuaren 15a, urriaren 12a, abenduaren 3a, abenduaren 7a eta tokiko festa egun bat. Araban, Bizkaian eta Gipuzkoan, 2005eko dekretu batek gehienez zortzi egun irekitzeko aukera ematen badu ere, ez da jaiegunetan lan egiten, sindikatuen presioaren ondorioz.

ELAren proposamena

Nafarroan, egoera bestelakoa da. Horregatik, urtarrilaren 5aren atarian izanik,  ELAk gainerako sindikatuei proposatu die jaiegunetan ateak irekitzearen aurkako protesta egitea. Sindikatuaren arabera, CCOOk eta UGTk ez dute bat egin, «estatu espainiarrean jaiegun gehiagotan irekitzen dutelako». ELAko Olaia Alonso eta Ainhoa Urkiaren arabera, sektore guztiak bete beharreko neurri lotesleak lor daitezke sektoreari begirako akordio bat hitzartuz gero: adibidez, astelehenetik larunbatera lan egiteko egutegia zehaztu daiteke, jaiegunik gabe. «Horrek eragotzi egingo luke jaiegunetan irekitzea», argudiatu dute.

ELAren arabera, jaiegunetan irekitzeak ez du jarduera ekonomikorik handitzen edo lanposturik sortzen: «Jendeak ez du gehiago erosten ordu gehiago irekitzeagatik», azaldu du Urkiak. Era berean, ez dute uste kontsumitzaileei askatasuna ematen zaiela, saltoki txikiek ezin dutelako egun gehiago ireki eta handiekin lehian jardun. «Balizko eskaera artifiziala da, sinetsarazi nahi digutelako eskubideak irabazten ditugula», azpimarratu dute. ELAko ordezkariek gogorarazi dute langileen lan baldintzak okertzen dituela, atseden hartzeko egunak kentzen baititu, eta lana euren bizitza pertsonalarekin uztartzea zaildu.

Nafarroako Gobernuaren jarrera ere kritikatu dute. Merkataritza Kontseiluak proposatutako egunak legeztatzen ditu, lan arloko afera dela esanez. «Hori gezur hutsa da. Zer eredu komertzial eta sozial nahi du?». ELAren ustez, mobilizazioa da bidea, eta herritarrei dei egin die jaiegunetan ez kontsumitzeko.

 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

ELAk hauteskunde sindikaletarako prestatu duen kanpainaren aurzkezpena. ©Berria

Sindikatuek ordezkarien erdiak izango dituzte jokoan hurrengo hilabeteetan

Imanol Magro Eizmendi

ELAk %36ko ordezkaritza du Hego Euskal Herrian, eta kopuru hori hobetzeko asmoz aurkeztuko da hauteskunde sindikaletara. Ordezkarien %47 berrituko dira urritik ekainera arteko tartean.

Nord Stream 1 gasbidea, Alemanian sartzen den puntuetak batean ©STEFAN SAUER (Efe)

Berlinek eta Moskuk «sabotajetzat» jo dituzte Nord Streameko isuriak

Jokin Sagarzazu

Gertakariak ez du eraginik izango Europarako gas horniduran, gaur egun bi gasbideak zerbitzuz kanpo baitaude. Zer gertatu den ikertzen ari dira.

Macron, Sant Nazaerko parke eolikoaren inaugurazioan. ©STEPHANE MAHE / EFE

Parisek arindu egin nahi du berriztagarrien tramitazioa

Iker Aranburu

Auzoekiko atzerapena murrizte aldera, proiektu eolikoak eta fotovoltaikoak moteltzen dituzten tramiteak eta auzibideak laburtzeko lege proiektua egin du Frantziako Gobernuak

Metalgitzako langile bat jardun betean. ©Marisol Ramirez / FOKU

Metalgintzako negoziazioak: Nafarroan akordioa gertuago dago; Bizkaian, urrun

Imanol Magro Eizmendi

Nafarroako metalgintzako patronalak UGTren eta CCOOren eskaintzak aztertuko ditu. Bizkaikoak, berriz, ez du aldatu lan ituna berritzeko eginiko azken eskaintza.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...