Osakidetza

Murga salatu du ELAk, eta Jaurlaritzak «ospea kendu» nahi izatea egotzi dio sindikatuari

ELAk dio Murga, Osasun sailburu izan aurretik, bi prozesutan ebaluazio batzordeko buru izan zela, legeak debekatzen duen arren. Osasun Sailak, berriz, esan du debekuak «langile ebentualei» baino ez ziela eragiten.

ELAko arduradunak, agerraldian. MARISOL RAMIREZ - FOKU
gotzon hermosilla
2020ko urtarrilaren 14a
20:54
Entzun

ELA sindikatuak salatu du Eusko Jaurlaritzako Osasun sailburu Nekane Murgak «modu irregularrean» parte hartu zuela lanpostuak betetzeko bi hautaketa prozesutan. Gertaerak 2017koak dira, Murga Osasun sailburu izendatu aurretikoak.

Osakidetzako ELAko arduradun Esther Saavedrak azaldu duenez, 2017ko martxoan eta abuztuan bi hautaketa prozesu jarri zituzten abian, zerbitzu eginkizunetan arduradun postu bana betetzeko. Lanpostu bakoitzak sei langile zituen bere ardurapean. Hautagai bakoitzak proiektu proba bat egin behar zuen, eta ebaluazio batzorde batek kalifikatu behar zituen proiektuak.

Hiru lagunek osatzen zuten ebaluazio batzorde horietako bakoitza, eta, Saavedrak azaldu duenez, bi-bietan Murga batzordeburu aritu zen. Baina legeak debekatu egiten du konfiantzazko kargudunek horrelako batzordeetan parte hartzea «behar bezalako independentzia eta inpartzialtasuna» ez dutelakoan, eta garai hartan Murgak konfiantzazko kargua zuen, Osasun Saileko Plangintza, Antolamendu eta Osasun Ebaluazioetako zuzendaria zelako.

Bi hautaketa prozesu horietako emaitza «harrigarria» izan zen ELAren esanetan, karrerako funtzionario bakar batek ere ez zuelako eskuratu eskainitako bi lanpostuetako bat bera ere. Lehenengoan deialdia hutsik gelditu zen, eta kontratazio poltsara jo zuten lanpostua betetzeko. Bigarrenean, departamentu horretakoa ez zen behin-behineko funtzionario bati esleitu zioten lanpostua.

ELAko Gizalan federazioko idazkari nagusi Igor Eizagirrek esan duenez, hau ez da «kasu bakar bat», ezpada «kultura eta praktika batzuen adibide». «Langileak hautatzeko sistema ustel bat dago indarrean, eta sistema horretan Osakidetzako eta Osasun Saileko zuzendaritza beste eragile bat da», azaldu du.

ELAk uste du fiskaltzari dagokiola ebaztea auzi honetan irregulartasun zantzurik ikusten ote duen, eta «ofizioz» jardun dezakeela. Hala balitz, prest azaldu dira auziaz daukaten dokumentazio guztia haren esku uzteko.

Jaurlaritzak«zuzentzeko»eskatu dio ELAri

Eusko Jaurlaritzak oso bestelako bertsioa eman du auziaz, eta esandakoa «berehala zuzentzeko» eskatu dio ELAri, «emandako informazioak gezurrezkoak» direlakoan. Osasun Sailak adierazi duenez, arautegian «langile ebentualei» galarazten zaie ebaluazio batzordeetan parte hartzea, eta hori ez zen Murgaren kasua, hura «kargudun publiko eta hautatu beharreko langileen maila goragoko nagusi» baitzen.

Gainera, Osasun Sailak zehaztu du ebaluazio batzordeetako osaketa sindikatuen ordezkariei jakinarazten dietela, «dagokion epean horren inguruko iritzia eman dezaten». Sailak dioenez, orduan sindikatuek ez zuten inolako eragozpenik jarri.

«Politikan eta jarduera sindikalean dena ez da zilegi», erantsi du Osasun Sailak, eta ELAri eskatu dio horrelako salaketarik ez egiteko, haren ustez «Osakidetzari eta Osasun Sailari ospea kentzea» baitute helburu bakar.

Osasun Sailaren arrazoibideak ere izan du ELAren erantzunik. Egindako salaketak berresteaz gain, ELAk esan du ebaluazio batzordeetan parte hartzeko ezintasunak langile ebentualei eragiten diela, «baina, kontrakoa irudi dezakeen arren, langile ebentualak ez dira aldi baterako langileak,  konfiantzazkoak baizik» –halakoa zen Murga–, eta Euskal Funtzio Publikoaren Legea aipatu du horren froga gisa.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.