Bilbon gertaturiko talde bortxaketa bat eta Ertzaintzak hari emandako erantzuna salatzeko, hainbat militante feministak Bilboko Udaletxeko zubia moztu zuten joan den abuztuaren 15ean, bi neska gaztek euren burua zubitik zintzilikatuta. Salatu dutenez, Ertzaintzak «erasoak saihesteko» neurri zerrenda «lotsagarri» bat zabaldu zuen, eta horri erantzunez eta talde bortxaketa jasan zuen emakumearekiko elkartasunez egin zuten ekintza. Hogei emakume identifikatu zituzten, eta zortziri isunak iritsi zaizkie orain: guztira 6.500 euroko isunak jarri dizkiete, Mozal Legea aplikatuta. Egun hartan ere Ertzaintzak izandako jarrera gaitzetsi dute: «Zubitik zintzilikatuta zeuden bi emakumeak eusten zituen sokaren azpitik jendeari pasatzen utzi zioten, Bilboko Gazte Sare Feministako kideek ohartarazita ere arriskutsua zela».
Agerraldi bat egin dute gaur Bilbon, Bilboko Gazte Feministen Sareak deituta, isunak salatzeko, eta gogoratu dute ez dutela damurik egindakoaz: «Berriro egingo genuke». Azpimarratu dute zilegi dela autodefentsa feminista eta «ekintza zuzena» erabiltzea, eta erasoen aurka egiteko neurri errealak eskatu dituzte: «Neurri paternalistetatik askoz harago doazen neurrien beharra azpimarratzen jarraitzen dugu, pairatzen dugun sistema heteropatriarkal, kapitalista eta kolonial honen oinarriak astinduko dituzten neurriak».
Isunak ordaintzeko dirua lortzeko, Marrabila artistak egindako laminak salduko dituzte auzoetan.
Gure kideei ezarritako 6.500€ko isunen harira, prentsaurrekoa burutu dugu goizean.
— Bilboko Gazte Sare Feminista (@gazte_sare) February 12, 2020
.
Laster info +
.
ERREPRESIOAREN AURREAN AUTODEFENTSA FEMINISTA! â¬Ã‚‡ï¸Ã‚ pic.twitter.com/Npu18USbMB
