Iragan asteburuan sexu eraso bat pairatu zuela salatu du neska adingabe batek Bilbon, eta, horren harira, hiru gizon gazte atxilotu zituzten atzo ertzainek, 18 eta 21 urte artekoak. Gaur goizean epailearen aurrean deklaratu dute atxilotuek, eta epaileak Basauriko kartzelan espetxeratzeko agindu du. Dagoeneko kartzelara sartu dituzte hirurak. Eusko Jaurlaritzako Segurtasun Sailak jakinarazi duenez, aurrekariak dituzte hiru gazteek
Erasoa asteburuan gertatu zen. Polizien arabera, Bilboko Solokoetxe kalean gertatu zen erasoa. Horren ondorioz, neska ospitalean artatu behar izan zuten, eta orduan izan zuten ertzainek gertatutakoaren berri. Ikerketa bat hasi zuten zer jazo zen argitzeko, salaketaren berri eman zuen orduan adingabeak, eta horren ondorioa dira atzoko hiru atxiloketak. Hainbat iturrik adierazi dutenez, 13 urte ditu biktimak.
Bilboko Udalak adierazpen bat onartu du gaur goizean, gertatutakoa gaitzesteko. Talde guztiek egin dute bat. Adierazpenean salatu dute eraso matxista bat izan dela eta giza eskubideak larriki urratzen dituela. Udalak emakumeenganako errespeturik gabeko edozein jarrera baztertu du, eta herritarrak deitu ditu horrelako erasoen aurka agertzera. Udalak bat egin du eraso horren aurka deitzen diren protesta guztiekin.
