NAGE Nafarroako Erreportari Grafikoen Elkarteak salatu du kasua: Ahotsa.info agerkari digitaleko kamerari Iñigo Orduñari 960 euroko isuna ezarri diote, Herritar Segurtasunerako Espainiako Legea aplikatuz —mozal legea izenarekin ezaguna—.
Iazko urtarrilean identifikatu zuten Orduña, Maravillas gaztetxea hustu ondotik gertatutako istiluetan. Kazetaria protesten berri ematen ari zela, Iruñeko Labrit aldapan, Espainiako Poliziak identifikatu zuen.
Ohar batean, mozal legea baliogabetzeko exijitu du NAGE elkarteak, kazetari eta komunikazio alorreko profesionalen egitekoa oztopatzen duelakoan: «Araudi horrek eragotzi egiten du gure lanbidean askatasunez aritzea, eta, aldiz, oso eraginkorra da eskubideak murrizteko garaian».
