Larrialdi egoera dela eta, Araban, Bizkaian eta Gipuzkoan gasaren hornidura bermatuta dagoela jakinarazi nahi izan dute energia iturri horren azpiegitura kritikoak kudeatzen dituzten eragileek, hots, EEE Energiaren Euskal Erakundeak, BBG Bahia Bizkaia Gasek, Nortegasek, Enagasek eta Enagas Transporte del Nortek (ETN).
«Profesional lantaldeen eta inguruko kolaboratzaileen konpromisoak ahalbidetzen du zerbitzua erabat bermatuta egotea», adierazi dute. BBGk munduko hainbat tokitatik itsasontziz datorren gas natural likidotua biltegiratzen du, baita hura atzera gas bihurtu ere. ETN eta Enagas dira gas hori garraiatzeko arduradunak, eta Nortegas banatzailea. EEEk jakinarazi duenez, Bermeoko Gaviota lur azpiko biltegia eta Irungo estazioa ere martxan daude.
Arabako, Bizkaiko eta Gipuzkoako energia kontsumoaren %31 gasari dagokiola gogorarazi du EEEk.«Funtsezko faktorea da une kritiko hauetan, osasun larrialdiagatik herritarrek etxean egon behar duten honetan».
