Gaur 700 urte bete dira Errenteria (Gipuzkoa) hiribildua eratu zenetik. Herriko plazan ospatzerik izan ez dutenez, konfinamendu garaiko plaza berriak bilatu ditu udalak: balkoiak eta Internet. Eguerdian, Zentenarioa kantaren bertsio berezia jo du musika bandak, eta, arratsaldean, Jon Maia dantzariak zuzendutako Plaza etxean izeneko bideoa eman dute zuzenean udalaren webgunean. Herritarrak balkoietara atera dira gero, Zentenarioa entzutera.
Maiak eta haren taldeak zuten jendaurreko ikuskizuna ekoizteko ardura, udalaren enkarguz, eta ikuskizuna herritarren etxeetara eraman dute azkenean. Parte hartzaile bakoitzak etxean filmatu du bere zatia.
Dena dela, herritarrek ere badute festako protagonista izateko aukera. Gaur amaituko da epea 30-40 segundoko bideoak bidaltzeko urteurrenaren webgunera. Udalak hainbat galdera proposatu dizkie —zer ikusten duzu zure etxeko leihotik? Zeintzuk dira zure ametsak? Zein gauza garrantzitsuez ohartu zara azken egunotan?...—, eta horietakoren bati erantzun beharko diete. Jasotako materialarekin Begiradak leihoetatik film kolektiboa osatuko dute.
