Dena prest zeukaten: datak erabakita eta parte hartzekoak ziren konpainiak ere kontratatuta, baina ez, azkenean ez dute egingo. Azken urteetan 20.000 ikusletik gora bildu ditu jaialdiak Lekeition (Bizkaia), eta Euskal Herrian kale arteei eskainitako hitzordu nagusietako bat bilakatu da urteekin. Antolatzaileek, ordea, ez dute modurik ikusi koronabirusaren hedapenari aurre egiteko ezarriko diren neurriak betetzeko, eta, ondorioz, bertan behera utzi dute Kaleka Nazioarteko Kale Arteen jaialdiaren 31. edizioa.
Deialdi irekia egin, eta antolatzaileek bostehun proposamen jaso dituzte aurten; haietako 20 hautatuak zituzten jaialdirako, hainbat hizkuntza, diziplina eta jatorritakoak. Besteak beste, Euskal Herriko, Espainiako, Kataluniako, Kolonbiako eta Txileko konpainiak ziren Lekeition egotekoak.
1995ean ere egin gabe geratu zen
Hiru hamarkadako ibilbidean bigarren aldia du herriak jaialdirik gabe; izan ere, 1995ean ere bertan behera geratu zen jaialdia. Kasu hartan, krisi ekonomikoa izan zen kausa, udalak bidalitako oharraren arabera.
