Merkatari eta ostalarien elkarteen eskaera bere egin du Eusko Jaurlaritzak. Jorge Belandia Lanbideko zuzendari nagusiak uste du Espainiako Gobernuak, iragarri berri duen deseskalatze plana dela-eta, «hausnartu» egin beharko lukeela aldi baterako lan erregulazioen aplikazioen inguruan; izan ere, jarduera mugatu batekin hasiko dira lanean sektore horietan, eta oso litekeena da langile guztientzako adina lanik ez egotea.
Beharginak babesteko, gobernuak legea aldatu zuen, eta debekatu egin zuen erregulazioan egon diren langileak kaleratzea: jardunera itzuli eta datozen sei hilabeteetan ezingo dute halakorik egin. Ezin dute lantaldea murriztu koronabirusaren ondoriozko arrazoi ekonomikoak, teknikoak, antolamenduari buruzkoak edo produkziokoak argudiatuta.
Dendariek eta ostalariek, beraz, negozioak irekitzean langile guztiak hartu behar dituzte, eta ezin dute ez kaleratzerik egin, ez beste lan erregulaziorik eskatu; horretarako, gelditzeko arrazoia ezinbestekoa dela erakutsi behar dutelako, eta laster gobernuaren baimena izango dutelako irekitzeko.
Horren harira, Belandiak, Herri Irratian eginiko elkarrizketa batean, ohartarazi du lan erregulazioen eskaera kopurua jaisten ari dela, eta langabezian dauden pertsonak «pixkanaka pilatzen» ari direla, eta hori «kezkagarria» dela. Lanbideko arduradunak adierazi duenez, joera hori apirileko datuetan «nabarmenago» islatuko da. «Ezin da langabezian dauden pertsonen zerrenda zabaltzen jarraitu; bestela, zaila izango da pertsona horiek bizirik irauteko behar dituzten prestazioak mantentzea», ohartarazi du.
