Hildako berrien kopurua nabarmen jaitsi da: COVID-19a zuten beste 11 pertsona hil dira azken orduetan. Beherakada nabaritu da atzo iragarritako hildako kopuruarekin alderatuta –23 izan ziren– , eta martxoaren 18tik ez ziren hain hildako gutxi erregistratu egun batean –bost izan ziren orduan–. Horrenbestez, Euskal Herrian 1.791 dira COVID-19arekin hildako pertsonak.
PCR bidez baieztatu dituzten kasuen kopurua ere eman dute Eusko Jaurlaritzak eta Nafarroako Gobernuak. Hain zuzen, beste 103 kasu antzeman dituzte proba horiek erabilita.
Gainera, 763 pertsonak ospitaleratuta jarraitzen dute Hego Euskal Herriko erietxeetan, eta horietako 129 ZIUetan daude. Hala ere, gero eta gehiago dira sendatu edo ospitaleko alta jasotzen dutenak. Gaur beste 521 izan direla iragarri dute.
