Herritarren konfinamenduak eta auto saltokirik gehienen itxierak eten egin dute auto berrien salmenta apirilean. Guztira, 90 auto matrikulatu dira Hego Euskal Herrian, iazko apirilean baino 4.147 gutxiago (-%95,2).
Martxoan ere astindu ederra hartu zuen auto berrien merkatuak, salmentak %76 jaitsi baitziren. Ondorioz, urteko lehen lauhilekoan iazko lehen lauhilekoan baino 9.103 auto gutxiago matrikulatu dituzte (-%52,2).
Koronabirusaren krisiak hankaz gora jarri du merkatua, eta zaila da ondorio argirik ateratzea bezeroek hautatutako motorren inguruan. Edonola ere, motor alternatiboek izan dute erorikorik txikiena (-%16,8); horrenbestez, auto hibridoen, elektrikoen eta gas naturalekoa darabiltenen merkatu kuota %10,7tik %18,7ra igo da.
Dieselaren gainbehera geratu egin dela ere antzeman daiteke. Iazko lehen lauhilekoan %23,4 izan ziren gasolioa erretzen dutenak, eta aurtengoan %24,2 izan dira.
Gasolina darabiltenak dira nagusi, baina haien kuota ia bederatzi puntu jaitsi da, %57,1era arte.
