39 urteko gizonezko bat atxilotu zuten larunbatean Donostian, bikotekide ohia jotzea egotzita. Eusko Jaurlaritzako Segurtasun Sailak jakinarazi duenez, atzo pasatu zen akusatua epailearen aitzinetik, eta epaileak espetxera bidali zuen, behin-behinean. Erasoa joan den larunbatean jazo zen, maiatzaren 2an, Donostiako Altza auzoko etxe batean. Ertzaintza etxebizitza batera joateko eskatu zuten, gizon batek bikotekide ohiari eraso ziolako.
Biktima ospitalera eraman behar izan zuten zaurien ondorioz. Ustezko erasotzaileak alde egin zuen, baina, ondoko kale batean aurkitu, eta atxilotu egin zuten, indarkeria matxistako delitu bat egotzita. Atxilotuak aurrekariak ditu delitu beragatik, eta bikotekide ohiarekin inolako harremanik izatea debekatzen zion babes agindu judizial bat zuen.