«Gaur Esloveniak ditu Europako daturik onenak pandemiari dagokionez, eta, beraz, amaitutzat jo genezake epidemia», esan du Janez Jansa lehen ministroak. Bi milioi biztanleko herrialdeak bi hilabete egin ditu berrogeialdian, eta mugak irekitzea erabaki du.
Gobernuaren arabera, Austria, Italia eta Hungariako herritarrak arazorik gabe sar daitezke herrialdean, puntu jakin batzuetatik, baina EBtik kanpokoek 14 eguneko berrogeialdi bat igaro behar dute muga igaro ostean. Dena den, ohartarazi dute beste hainbat neurrik ere indarrean jarraituko dutela, kutsatzeko arriskua dagoen bitartean; besteak beste, segurtasun tartea eta gune publikoetan maskarak erabili beharra.
Epidemia amaitutzat eman izanak baditu ondorio ekonomikoak ere, gobernuak bertan behera utzi ahalko baitu berez ekainaren amaierara arte indarrean zeuden herritarrentzako laguntza ekonomikoak.
COVID-19 lehen kasua martxoaren 4an agertu zen Eslovenian; Italiatik itzuli berri zen herritar bat izan zen lehen positiboa. Zortzi egun geroago, epidemia egoera ezarri zuen gobernuak, eta mugatu egin zituzten herritarren joan-etorriak. Maiatzaren 13rako, 1.467 ziren gaixotuak, eta 103 hildakoak.
