Erizain laguntzaile batek izan zuen krisia, bere burua lankide baten eta begirale baten arteko eztabaida baten erdian ikusi zuenean. 2018ko abuztuan izan zen, San Andres Eibarko zahar etxean, eta larrialdietara joan ondoren hilabete eta erdi egon zen gaixoaldian. Hasieran, enpresaren osasun aseguru pribatuak muzin egin zion tratamendua bere gain hartzeari, baita lan istripua izateagatik langileari dagokion ordaina ere. Bi urte geroago, baina, EAEko Auzitegi Nagusiak ebatzi du lana izan zela gaixoaldiaren jatorria, lantokian eta lan orduetan gertatu zelako, eta lesio fisikorik ez egon arren, lan istripua dela.
CCOO sindikatuak eman du kasuaren berri, eta, haien arabera, epaileak «zalantzarik gabe» ebatzi du lan istripua dela. Are gehiago, eta betiere sindikatuaren arabera, ebazpenak garbi uzten du ezerk ez duela ulertzera ematen langileak «izaera bereziki sentikorra» duenik, edota krisiak lanaren inguruko gorabeherekin harremana duela «zalantzan» jar dezakeen beste gaixotasunik. Gai berean, sindikatuak salatu du aseguru pribatua «ezkutatzen» saiatu zela gaixoaldiak lan baldintzekin harremana zuela.
