Madrilek atzera egin du: uztailaren 1ean irekiko du Iparraldearen eta Hegoaldearen arteko muga

Aurrena, Reyes Maroto Espainiako Industria ministroak eman du dataren berri, baina gobernuak gero zuzendu egin du ministroak esandakoa. Ia hiru hilabete dira muga itxita dagoela, eta horrek eragozpen ugari eragin dizkie eremu horretan bizi diren herritarrei.

Behobiako zubia, Irun eta Hendaia artean, itxita.
Behobiako zubia, Irun eta Hendaia artean, itxita. Andoni Canellada / Foku Tamaina handiagoan ikusi

Jon O. Urain -

2020ko ekainak 4

Hego eta Ipar Euskal Herriaren arteko muga itxita egon da martxoaren erdialdeaz geroztik; herritarrak salbuespenetan igaro izan dira batetik bestera ia hiru hilabeteotan, eta horrek eragozpen ugari sortu ditu hainbat tokitan; besteak beste, Irun (Gipuzkoa) eta Hendaia (Lapurdi) arteko igarobidean. Uztailaren 1etik aurrera, ordea, ez da oztoporik izango Iparraldearen eta Hegoaldearen artean mugitzeko, baina eguna ere eztabaida iturri izan da azken orduetan.

Izan ere, Espainiako Industria, Merkataritza eta Turismo ministro Reyes Marotok jakinarazi duenez, ekainaren 22an ziren muga zabaltzekoak. Hasieran, uztailaren 1a aipatu zuen Pedro Sanchez Espainiako gobernuburuak, baina lurreko garraiobideak estatu mugakideetara lehenago zabaltzeko aukera azaldu du Maroto ministroak. Ekainaren 22a aipatu du, orduan amaituko delako alarma egoera eta, harekin batera, mugak ixteko ministerio agindua.

Marotok nazioarteko hedabideetako berriemaileekin eginiko bilera batean aipatu du ekainaren 22a, baina bi ordu geroago zuzendu du Moncloak, esan baitu «uztailaren 1etik aurrera» zabalduko dutela «nazioarteko mugikortasun segurua»: «Gobernuak harreman etengabea dauka Europako Batzordearekin eta estatu kideekin, Europa barneko mugetako kontrolak modu progresiboan bertan behera uzteko prozesua koordinatzeko». Alarma egoera amaitzean, ekainaren 21tik aurrera, joan-etorriak erabat libreak izango dira Espainiako Estatuan zehar, eta, beraz, baita Hego Euskal Herri osoan ere, baina ezingo da aske mugitu Ipar eta Hego Euskal Herriaren artean.

Gaur egun, Ipar Euskal Herriko herritarrek baimena dute Lapurdin, Nafarroa Beherean eta Zuberoan mugitzeko, baita Frantziako Estatu osoan ibiltzeko ere. Hegoaldekoentzat, berriz, bestelakoa da egoera; gaur-gaurkoz, Nafarroako herritarrak beren herrialdean ibil daitezke. Arabako, Bizkaiko eta Gipuzkoako herritarrak ere euren probintzian soilik mugi daitezke —salbuespen egoera batzuetan joan daitezke norberarena ez den hiru herrialde horietako beste batera—, baina espero da datorren astean hiru lurraldeak konfinamendua arintzeko hirugarren fasera igarotzea eta hiru probintzien arteko joan-etorriak baimentzea.

Iñigo Urkullu Jaurlaritzako lehendakariak eta Alain Rousset Akitania Berriko presidenteak ere eskatua zuten Euskal Herri osoan mugitzeko aukera emateko; Urkulluk gutun bat bidali zion Espainiako Gobernuko presidenteari, «Akitania Berria-Euskadi-Nafarroa euroeskualdean mugaz gaindiko mugimendua zabaltzeko». Gutun bera bidali zion Roussetek Edouard Philippe Frantziako lehen ministroari.

Espainiako Gobernuak turismoaren alorrean kokatu du erabakia; Madrilen asmoa da uztailaren 1etik aurrera mugak zabaltzea Europako Batasuneko turistentzat, baina arinago zabaldu nahi ditu Portugalgo eta Frantziako estatuekiko lurreko mugak. Edouard Philippe prest agertu zen ekainaren 15etik aurrera lurreko muga horiek zabaltzeko.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR proba bat, Gurutzetako ospitalean. ©Luis Jauregialtzo, FOKU

Positibo kopuruak goia jo du Nafarroan

Uxue Rey Gorraiz

Beste 749 kasu atzeman dituzte Hegoaldean, eta nabarmen ugaritu dira Nafarroan: 362 kutsatu detektatu dituzte azken egunean. 501 lagun daude erietxeratuta Hego Euskal Herrian, eta 82 gaixo daude ZIUetan.

Zestoa, artxiboko irudi batean. ©Gorka Rubio / Foku

Eraikin publikoak eta tabernak itxi dituzte Zestoan

Berria

28 kasu baieztatu dituzte azken egunetan, eta neurri murriztaileak hartu dituzte agerraldiari aurre egiteko asmoz. Datozen egunetan egoera «kontrolatzea» espero dute.

Iñigo Urkullu omenaldian ©Eusko Jaurlaritza

Koronabirusaren biktimak omendu dituzte Gasteizen

Uxue Rey Gorraiz

Iñigo Urkullu lehendakariak gidatu du ekitaldia. Pandemiarengatik hildakoak gogoratu ditu, eta elkartasuna adierazi die familiei. «Elkarrizketa soziala» bultzatu dadin galdegin du, bizikidetza sozialaren berreraikuntzarako.

Sindikatuen eta Sareren elkarretaratzea, presoen egoeraren harira Bilbon. ©Marisol Ramires/FOKU

Hainbat espetxetan komunikazioak eten dituztela salatu dute Sarek eta Etxerat-ek

Maria Ortega Zubiate

Presoek eta haien senideek “garai oso zailak” bizi dituztela adierazi dute bi elkarteek, eta pandemiak “salbuespenezko erregimenaren aplikazioa” areagotzen duela. Positibotzat jo dituzte Eusko Legebiltzarrean eta Espainian espetxe politika aldatzeko egindako adierazpenak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna