Iragarpen ilunak gero eta gehiago dira. Frantziako ekonomiak urtea %10eko atzerakadarekin bukatuko duen beldur da Frantziako Bankua. Langabeziak ere gora egingo duela uste du. Lau hilabetean %8,4tik %10,1era handitu da langabezia tasa Frantzian, eta are gehiago igoko da 2021. urtean, %11,7ra.
Osasun krisiaren gogorrenak jada iraganda, krisi ekonomikoaren latzenak oraindik ikusteko dago Europa, eta, Eusko Jaurlaritzak egin bezala, herrialdeetako gobernuek ere laino beltzak dituzte ikusmiran. Alemaniak, esaterako, barne produktu gordinak %6 behera egitea espero du. Eta beste datu txar bat ere azaldu du gaur Alemaniak: 1950ean datuak biltzen hasi zenez geroztik ikusitako beherakadarik handiena izan dute esportazioetan joan den apirilean, atzerrirako salmentak ia heren bat murriztu baitziren, %31,1.
Europako Batasuna
Eurostatek ekonomiaren bilakaeran lehen hiruhilekoko datuak eman ditu. Italian (-%5,4), Frantzian (-%5) eta Espainian (-%4,8) izan dira atzerakada handienak BPGan, eta Alemanian galera esanguratsua izan da (-%2,3). Erresuma Batuan, gutxiago bada ere, geldotu egin da ekonomia (-%1,6). Finlandian (-%0,7) eta Danimarkan ere (-%0,3) murrizketa izan da. Irlandan, ordea, ez; lehen hiruhilekoan %4,5eko hazkundea izan du Irlandako barne produktu gordinak.
