Jaurlaritzak 140 milioi euro jarriko ditu enplegua sustatzeko

Bereziki, formakuntza planentzat izango da dirua. Urkulluk jakinarazi du hurrengo legealdirako «estrategia berria» prestatzen hasi direla.

Urkullu lehendakaria eta hiru ahaldun nagusiak, aurreko astean eginiko bileran. JAIZKI FONTANEDA (FOKU)
jokin sagarzazu
2020ko ekainaren 16a
11:58
Entzun

Iñigo Urkullu lehendakariak jakinarazi du bere gobernuak 140 milioi euro jarriko dituela COVID-19aren krisiaren ondorioz galdutako enplegua berreskuratzeko.

42 milioi euro emango dizkie udalei, enplegua sustatzeko tokiko planak abian jar ditzaten; bereziki, «lehentasunezko jardueratzat» jotako sektoreak indartzeko.

Beste 66 milioi langabezian dauden pertsonei prestakuntza emateko, Lanbideren bidez; Urkulluk esan du «prestakuntza, diagnostikoa eta aholkularitza pertsonalizatua» ematea dela helburua, laneratzea errazteko. Horrekin batera, Hezibi programaren beste edizio bat jarriko da martxan, 2,3 milioi euroko finantzaketarekin. Programa horren helburua da lanbide heziketan dauden gazteak prestatzea, hezkuntza eta lan praktikoa aldi berean eginez.

Azkenik, Gobernu Kontseiluak 30 milioi euroko gastua baimendu du lanean ari diren eta euren gaitasunak hobetu nahi dituzten pertsonei prestakuntza emateko. «Langileek euren lan egoera hobetzea edo lan egiten duten enpresen aldaketetara egokitzea nahi dugu», azaldu du Urkulluk.

Horrekin batera, jakinarazi du susperraldi ekonomikorako eta enplegurako «estrategia berri» bat lantzen hasi direla, hurrengo legealdian abian jartzeko. Lehendakariak azaldu duenez, besteak beste, gai horixe jorratu zuten joan den astean Araba, Bizkai eta Gipuzkoako ahaldun nagusiekin izandako bileran.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.