Jaurlaritza haserre dago Madrilekin, ez duelako negoziatu 16.000 milioiren funtsaren banaketa

Gasteizko gobernuak Itun Ekonomikoaren Batzorde Mistoaren bilera bat eskatu dio Espainiakoari.

Azpiazu eta Montero, martxoan egindako bilera batean. MARISCAL / EFE
Iker Aranburu.
2020ko ekainaren 16a
15:47
Entzun

Espainiako Gobernuak gaurko bileran onartu du 16.000 milioi euroren funts berezi bat sortzea COVID-19ak egin dituen kalteei aurre egiteko. Dirua «behar handia duten erkidegoetara» iritsiko dela ziurtatu du Maria Jesus Montero gobernu horretako bozeramaileak, baina ez du kopururik eman. «Erkidego guztiak entzun ondoren» sortu duela ziurtatu du Monterok, baina Jaurlaritzako Ogasun Sailak erantzun dio ez dela izan halakorik.

Agiri baten bidez, Jaurlaritzak aldarrikatu du Espainiako Gobernuak berarekin negoziatu behar duela dirua nola banatu, eta, kasu honetan, «aldebakarreko planteamendu bat» egin duela.

Horregatik, Itun Ekonomikoaren Batzorde Mistoa premiaz biltzeko eskatu du, uste baitu Madrilek kupoa zehazteko metodologiari buruzko legearen «urraketa nabarmena» bideratu behar dela.

COVID-19 Funtsa aurrekontu izaera duen ezohiko funtsa dela gogorarazi du Jaurlaritzak, eta horrelakoak berarekin negoziatu behar duela dio Kupoaren Legearen 11.4 artikuluak, «hitzez hitz». 

Gainera, Gasteizko gobernua ez dago ados Madrilek foru erkidegoak funts horren atal batetik baztertu izanarekin.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.