Konfinamenduaren amaierak pixka bat baizik ez zuen arindu turismoaren erorikoa. Eustaten arabera, Araban, Bizkaian eta Gipuzkoan dauden 618 hotel edo antzekoetatik 188 baizik ez ziren irekita izan maiatzean. Hau da, %30 baizik ez. Apirilean 56 izan ziren, eta horietako batzuk osasun langileei aterpea emateko egon ziren zabalik, ez zitezen etxera itzuli eta senideak kutsatzeko arriskuan jarri.
Hotel gutxi egon ziren irekita, eta oso bezero gutxi izan zituzten. Guztira, 7.764 bisitari eduki zituzten, eta 30.049 gaualdi igaro zituzten. Iazko maiatzarekin konparatuz gero, bezeroak %97,3 gutxiago izan dira (295.055, 2019ko maiatzean), eta gaualdiak, berriz, ia %95 gutxiago.
Jarduera gutxi suspertu da landetxeetan ere. Apirilean 31 izan ziren irekita, eta 167 izan ziren maiatzean. Beste 260, berriz, itxita egon ziren. Guztira, 996 bezero eta 5.001 gaualdi izan zituzten.
Ekainean hartu du beste bultzada bat turismoak, arindu egin baitira pertsonen joan-etorriak debekatzen zituzten arauak.
