Euskaltel taldeak hitzarmena egin du Orangerekin, eta, horri esker, haren zuntza 1,8 milioi etxebizitzara heldu ahal izango da, bistream modalitatean. Frantziako konpainiak Espainian egingo dituen 3 milioi zuntz hedapenetatik gutxienez 1,8 milioi eskuratzeko aukera izango du Euskaltelek. Hedapena 2023a amaitu baino lehen burutzeko asmoa du.
Euskaltelek «aurrerapausotzat» jo du Frantziako telekomunikazio enpresa horrekin eginiko akordio berria. 2019ko abenduaren 13an, handizkako kontratuak berritu eta hobetu zituen Orangerekin, bai sare finkorako bai sare mugikorrerako, «aurreko akordioen baldintzak hobetuz eta haien iraupena luzatuz».
Iazko emaitzen berri ematean, Euskaltelek jakinarazi zuen bere zerbitzuak Hego Euskal Herriko eta Espainiako 13,5 milioi etxetara iristen zirela, bere sare propioa eta hirugarrenen sarbidea erabilita; Orangerena, besteak beste.
Euskaltelek adierazi du sarearen estaldura handitzea «funtsezko aktibo bat» dela taldeak Espainian zabaltzeko duen planaren barruan —18 milioi etxetara iristeko aukera izan nahi du bigarren hiruhilekoaren amaierarako—. Virgin telco markarekin egingo du hori.
Ekainaren 13an, Xabier Iturbe Euskalteleko presidentearekin eginiko elkarrizketa argitaratu zuen BERRIAk.
