Ellakuriaren hilketa

Lekukoen testigantzak gaur Inocente Montanoren aurkako epaiketan

Rene Yusshy Mendoza El Salvadorko armadako tenienteak deklaratuko du gaur lekuko gisa. Justiziarekin kolaboratu eta egindakoa  onartu duen militar bakarra da Yusshy Mendoza. 

Inocente Montano epaiketaren une batean. EFE
Ainhoa Larretxea Agirre.
2020ko uztailaren 8a
11:50
Entzun

Gaur ekingo diote berriz, Espainiako Auzitegi Nazionalean, Inocente Montano El Salvadorko Defentsa ministrorde eta armadako koronel izandakoaren aurkako epaiketari. 1989ko azaroaren 16an Ignacio Ellakuria euskal herritarra eta bertze lau jesuita eta hiru herritar hiltzea egozten diote. Fiskaltzak 150 urteko kartzela zigorra eskatu du harentzat. 

Rene Yusshy Mendoza El Salvadorko armadako tenientea zena eseriko da gaur akusatuen aulkian. Hasieran, Yusshy Mendoza bera ere epaitzekoak ziren, baina epaiketa hasieran preskribitutzat jo zituzten haren delituak.

Justiziarekin kolaboratu duen eta egindakoa onartu duen jeneral bakarra da Yusshy Mendoza. 1993 arte kartzelatuta egon zen, eta amnistia legea ezartzearekin bat askatu zuten. Atlacatl batailoiko kidea izan zen, eta berari egozten diote hilketak egitea. 

Mendozaren testigantza klabea izango da Montanoren aurkako epaiketan. Izan ere, lekuko izateak epaiketan egia erratera behartzen du. Montanok, orain arte, beti ukatu izan du hilketekin zerikusia zuela. 

Mendozaren testigantzaren ondotik, Alvaro Henry Campos eta  Edward Sidney Blancoren txanda izango da: El Salvadorko prozesu judizialaren hasieran fiskal eta ondotik Jesusen Lagundiaren akusazioaren abokatuak izan ziren . 

Lucia Barreda hilketak ikusi zituen lekuko bakarra eta haren senar Jorge Cerna izango dira hurrengo lekukoak. Eric Warren AEBetako armadako jenerala izango da bere testigantza emango duen azken lekukoa. 

Behin-behinean espetxeratuta

Auzitegi Nazionalak hogei bat militar ohi auzipetu zituen, baina El Salvadorko agintariek ez diete jaramonik egin estradizio eskaerei. Montano, berriz, 2015ean atxilotu zuten, AEBetan, eta bi urte geroago Espainiako Estatuaren esku utzi zuten AEBek. 2017ko azaroaren 29tik dago behin-behineko espetxealdian. Osasun arrazoiak eman ditu kartzelatua ez izateko.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.