Ibilbide luzea du ikerlari eta irakasle gisa, eta horren aitortza jaso zuen atzo, Gasteizen, Joseba Agirreazkuenaga (Bilbo, 1953) ikerlari eta EHUko Historia Garaikideko katedradunak: 2019ko Euskadi ikerkuntza saria eman zion Iñigo Urkullu jarduneko lehendakariak. Eusko Jaurlaritzako Hezkuntza Sailak ematen du urtero saria, eta bi urtean behin aldatzen dute ikerketa adarra: urte bikoitietan, gizarte zientzien arloko ikerketek jasotzen dute aitortza, eta, urte bakoitietan, berriz, zientziaren eta teknologiaren arloko ekarpenek. Oraingoan, Agirreazkuenagarentzat izan da saria, hark «egindako ikerketa historikoengatik eta dibulgazio lanagatik». 1980tik ari da EHUn lanean.
Ekitaldian, Urkulluk nabarmendu du pertsona «konprometitua» dela Agirreazkuenaga: «Euskal gizartearekin, eta baliabide kulturalekin zein sozialekin konprometituta da, baita dibulgazioarekin ere». Lehendakariak nabarmendu du katedradunak erakutsi duela «ezagutza ondasun komun bat» dela. Epaimahaiak ere horixe azpimarratu du: Agirreazkuenaga ikerkuntzan aritu dela, betiere gizarteari jakinduria zientifikoa helarazteko asmoz. Katedradunak eta beste kide batzuek horretarako sortutako egiturak ere aipatu dituzte, hala nola Euskal Herriko Zuzenbide Historikoaren Institutua eta Bidebarrieta Kulturgunea.
Euskal historian aditua
Gehienbat Euskal Herriko historiari lotutako lanetan aritu da Agirreazkuenaga. 1972an hasi zen ikerlari, Jose Miguel Barandiaranen eskutik, eta Deustuko Unibertsitatean egin zituen Filosofia eta Letren ikasketak. Ondoren, Julio Caro Barojaren gidaritzapean ondu zuen doktore tesia. Besteak beste, Euskal Herriko egitura administratiboen historiari eta iraultza liberalei buruzko lanak egin ditu. 2011n, Euskal Herritarren burujabetza politikoaren auzia mundu berriaren zurrunbiloan publikatu zuen, eta Bilboko Udalak Miguel de Unamuno saria eman zion lan horrengatik.
