Pozik agertu da Pablo Machin Alaveseko entrenatzaile berria bere aurkezpeneko prentsaurrekoan. Denboraldi baterako sinatu du, eta teknikari espainiarra gustura dago Alavesek beregan konfiantza jarri duelako: "Egia da ni normalean denboraldi bateko baino gehiagoko proiektu luzeagoetan ibiltzen naizela. Halere, hemen baldin banago, akordio bat lortu dugulako nago hemen".
Europa ligan aritua da Machin, Sevillarekin eta Espanyolekin; talde arabarrarekin, baina, hasiera batean helburua beste bat dela azpimarratu du: "Gure helbururik behinena mailari eustea da. Gero, sasoian zehar egindako lanak esango digu zein den gure helburua azkeneko partidetan: gora begiratzea ala Lehen Mailari eustea". Sergio Fernandez Alaveseko kirol zuzendariak Europan jokatzeko ametsa baretu nahi izan du: "Azken urteak ikusita, Alavesen perspektiba galdu dugula uste dut. Zein garen, eta zenbat kostatu zaigun honaino iristea”.
Datorren denboraldiko talde osaketari buruz gutxi hitz egin dutela aitortu du Machinek: "Dena oso azkar joan da, eta ez dugu horretaz hitz egiteko astirik ia izan. Hala eta guztiz ere, kirol zuzendaritzan konfiantza daukat, eta seguru nago taldearen maila igoko duten jokalariak ekarriko dituztela".
