Belgikako Gobernuak Bizkaira joatea debekatu die herritarrei, guztiz beharrezkoa ez den kasuetan izan ezik. Bizkaitik herrialdera iristen direnek hamalau eguneko berrogeialdia bete beharko dute, eta PCR proba egin.
Osasun krisiak iraun bitartean, atzerritik egin beharreko bidaiak antolatzeko, Atzerri Ministerioak kudeatutako kolore kode bat erabiltzen du Bruselak. Horren arabera, funtsezkoak ez diren bidaiak debekatzen dira gune gorrietara; eta eremu horietatik iritsitako bidaiariak, PCR proba egitera behartzeaz gain, hamalau egunez bakartu behar dira herrialdera iristen direnean —gune gorrian kokatzen dira Bizkaia eta Nafarroa—. Eremu laranjako lurraldeetan, ordea, betebehar horiek gomendioak dira —eremu laranjan kokatzen dira Araba eta Gipuzkoa—. Gune berdeetan, berriz, ohiko neurriez gain, ez da inolako eginkizunik bete behar.
